ISYU SA HALANGKAW NA TARIFA KAN CASURECO II: Hababang tarifa kan power supplier dai pinatulan

Dawa barato an presyo cada kilowatt hour alagad dai pueding magbakal nin suplay nin kuryente an Camarines Sur II Electric Cooperative (Casureco II) Inc. sa Power Sector Assets and Liabilities Corporation (PSALM) huli ta sadit na power supplier ini mantang an Casureco II nag-aabot sa 60 hasta 80 megawatts an kinakaipuhan na suplay nin kuryente aroaldaw.


Nagpapabakal sana an PSALM nin kuryente sa sadit na cooperativa nin electricidad arog kan Casureco IV sa Partido area.


Huli kaini, an manijamiento kan Casureco II mayong plano magkontrata sa PSALM na mas hababa an presyo asin hababa man kuta an tarifa na isisingil sa miembros-consumedores.


Alagad kun magkulang-kulang an saindang suplay sa sadit na cooperativa nin electricidad posibleng magbalyo naman sa ibang mga power supplier nganing digdi na magbakal asin magpadagos an saindang serbisyo sa miembros-consumedores.


Ini an paliwanag kan Casureco II, sa paagi ni Rinner Bucay opisyal na parataram kan cooperativa kasunod kan mga tuyaw kan ibang mga miembros-consumedores kun tano ta dai nagbabakal nin power supply an cooperativa sa hababang presyo nin kuryente nganing magbaba an tarifa siring kan Casureco IV sa Partido distrito na nagbabakal sa PSALM.


An tarifa kan Casureco IV sa miembros-consumedores nag-aabot sana sa labing P9.00 mantang an Casureco I, Casureco II, asin Casureco III nagdadalagan sa P15.00 hasta P17.00 cada kWh hali sa dating P9.00.


An sadit na cooperativa nin electricidad nagcoconsumo sana nin 10 hasta 15 megawatts kumpara sa dakulang cooperativa arog kan Casureco II na nag-aabot sa 60 hasta 80 megawatts.


An pagparalangkaw kan tarifa sa cooperativa nin electricidad epekto kan halangkaw na presyo kan produkto nin petrolyo asin nagparalangkaw an inaangkat na oring kan mga power supplier na nag-susuplay nin kuryente sa darakulang cooperativa nin electricidad, sabi pa ni Bucay.


Sa ngunian haros gabos na cooperativa nin electricidad sa nasyon nagparalangkaw an singil sa tarifa sa kuryente epekto kan halangkaw na presyo na saindang binabakal sa mga power supplier. (dpa)