ISYU SA LAND CONVERSION SA BARANGAY PACOL: DAR, hinahagadan paliwanag kan SP

Piglalaoman na yaon na sa lamesa kan opisina sentral kan Department of Agrarian Reform (DAR) an pinadarang resolusyon kan Sangguniang Panlungsod na pinamamayohan ni Bise Alcalde Gabriel H. Bordado Jr. kan Ciudad nin Naga na naghahagad nin paliwanag kun panong na-aprubar kan ahencia an land conversion kan maabot sa nieve (9) hektaryas na ‘‘irrigated farm’’ sa Barangay Pacol apesar na mayo pang reclassification an City Hall.

Ini an kumfirmasyon sa Bicol Mail ni Consejal Frank Mendoza padreno kan sinambit na resolusyon na naaprubaran kan SP dai palang nahahaloy. An envueltong mahiwas na kaomahan sarong ‘‘irrigated farm’’ inaprubraan an land conversion nganing gibohon na pribadong kamposanto.

An mga residentes harani sa lugar kan pribadong proyekto maging motorista nahahandal sa posibleng epekto kaini sa tubig baha kun iguang makusog na mga pag-uran asin calamidad.

Afuera kaini, sinabi ni City Agriculturist Ernesto ‘‘Jab’’ Asenso III dai nag-agi sa saindang opisina nganing mag-isyu nin certificasyon na bakong mahiwas na omahan. Naheheling kan publico na perang decada nang omahan na kabale sa lugar sa ciudad na irrigated farm na inaanihan nin paroy.

An Barangay Council kan Pacol enot nang nag-isyu nin certificate of no objection nganing gibohon kamposanto alagad dai man ini makukunsiderar na sarong development permit huli ta dai nag-agi sa City Hall o Sangguniang Panlungsod.

Nagpa-apod man public hearing an Barangay Council kan 2023 alagad si mga apektadong residentes kan proyekto dai naimbitaran.