Isyu sa pagsa-pribado kan MNWD, 2019 binasura na

An Metropolitan Naga Water District (MNWD) dawa nag-aatubang sa tolong taon nang pagkalugi mayo sa plano kan junta directiva isapribado.


Ini an asegurasyon ni Board Chairman Gilbert Albero maging an propuesto na magpalangkaw nin singil sa tarifa sa tubig imposibleng mangyari ini ngunian na taon mantang igwa sindang piglalaoman na Php5 milyon na revenue.


An isyu sa ‘‘privatization’’ kun babasehan an resolusyon numerado 99 s. of 2019, an junta directiva sa saindang joint and collective motion aprubado an sinambit na resolusyon na nagpapahayag nin suporta para sa ‘‘nationwide campaign against the privatization of water districts’’. An resolusyon suportado kan manijamiento asin kan enterong MNWD community.


An ibang pigsa-pribadong water district nagpalyar na mas mapaangat an serbisyo asin an apektado an consumedores asin ini nangyari na sa ibang mga water district napipiritan na magpatong kan singil sa tarifa nganing makabangon. Huli kaini an MNWD nagtutubod na dai maasenso kun korporasyon an mapadalagan mantang nagkaperang mga isyu na dai makakatabang sa water district.


Kabale digdi an paglangkaw kan tarifa sa tubig kan pribadong kumpanya nganing magdakula an saindang ganansia na daing konsultasyon sa consumedores asin Layoffs na mabugtak kan saindang sadiring personajes asin mabawasan an operation expenses para sa halangkaw nindang ingreso.


Huli kaini, solido an saindang panindugan contra sa pagsa-pribado.


Maging an ibang mga division asin department managers kan MNWD nagtutubod na dai dapat mangyari an pagsa-pribado sa paglaom na makakabangon man giraray an manijamiento hale sa tolong taon na pagkakalugi.


Nagtutubod sinda na dai na dapat makiaram sa sainda an arin man na opisyal kan City Hall mantang kun may mismanagement na nangyayari ini ‘‘sarong internal problem’’, puedeng resolberan sa laog kan manijamiento na dai na kaipuhan mag-epal an politico mantang gagamiton sana sa politica huli ta nagrarani na an eleksyon lokal sa Mayo 9, 2022.