top of page

ISYU SA ‘REFUND’ KAN MIEMBROS-CONSUMEDORES: Aksyon kan ERC hinuhurotna kan SP vs Casureco II

Manijamiento kan EC nagpaliwanag


Pinapusog na kan Sangguniang Panlungsod sa Ciudad nin Naga an sarong resolusyon nganing huroton sa Energy Regulatory Commission (ERC) na iimplementar na kan Camarines Sur II Electric Cooperative (Casureco II) Inc. an ‘Refund’ sa miembros-consumedores si gabos na nakolecta na generation rate sa load weight average NPC TOU rate sa Luzon poon kan Mayo 26, 2015 sagcod sa ultimong billing antes binaba kan ahencia an desisyon kan Abril 17, 2024.


Alagad hinahagad pa sa ERC na ibiglad na kun perang cantidad nganing malinaw na an isyu.


An resolusyon pinangenotan ni Consejal Vidal Castillo asin naging ‘'joint and collective’’ sa ginibong sesyon regular kan Hunyo 4, 2024 na nakatalaan nang isumiter sa Office of the Mayor nganing pirmahan ni Alcalde Nelson Legacion asin ipadara ki ERC Chairperson Mona Dimalanta.


Sinuportaran kan gabos na miembros kan SP sa tahaw kan nagpaparalangkaw na an singil tarifa sa kuryente kan Casureco II na maabot na sa onse pesos cada kilowatt hour.


Antes inaprubaran an resolusyon nagkaigwa ngona nin privilege speech si Consejal Castillo na napapanahon nang mag-aksyon an ERC mantang agrangay na an ribo-ribong miembros-consumedores sa halangkaw na tarifa nin kuryente kan cooperativa nin electricidad.


Afuera sa Ciudad nin Naga, an iba pang municipalidades na sakop kan Casureco II iyo an Canaman, Magarao, Bombon, Calabanga, Tinambac, Siruma, Pili, Milaor, asin Minalabac.


PALIWANAG KAN CASURECO II


Liwat nagpaliwanag an cooperativa sa paagi kan saindang spokesperson, Rinner Bucay na andam sindang magsunod sa desisyon kan ERC mantang dapat malinaw kun garano an ire-refund, kun anong mga taon, pano si refund alagad an pigsusugo duman an generation company na mag refund sa Casureco II.


An sinambit na isyu panahon pa ni dating General Manager Emelita Candia na perang veces nang nag-follow sa ERC na sagcod sa ngunian mayo pang reply, sabi pa.


Sa isyu sa paglangkaw kan tarifa, saiyang sinabi na bako lang Casureco II an apektado envez gabos na mga ECs huli ta sagcod na nasa irarum kita sa Yellow asin Red alert kan Luzon Grid huli sa pagnipis o kakaposan sa reserbang kuryente na naglalangkaw man an ‘demand’ ngunian na panahon nin tag-init.


Nagpaparalangkaw man an presyo kan pinapabakal na suplay nin kuryente kan power suppliers, sabi pa ni Bucay.

コメント


bottom of page