Isyu sa ‘‘suhol’’ vs LTO law enforcers, puros alegasyon

An mga law enforcer kan Land Transportation Office (LTO) Bicol sa Del Gallego Border, pig-pull out na alagad pigdestino sinda bilang roving na dai man nagrarayo sa border control.


Ini an aksyon ni LTO regional director Francisco Ranches kasunod kan mga impormasyon hale sa media sa mga reclamo na igwang naghahagad nin ‘‘suhol’’ nganing palusoton an mga kulorum na vehiculos asin mayong documentos an mga returning residence na pigmamando kan IATF.


Alagad saiyang piglinaw sa saindang imbestigasyon anas ‘‘general allegations’’ asin mayong prueba nganing castigohon kun igwa man nagpapasaway na law enforcer.


Nganing makalikay sa mga alegasyon, pinagmarhay kan LTO director na pahalion muna sa border control asin an saindang trabajo magpatrolia para ma-monitor an mga kolurom.


Igwa nang 183 na mga kolurom na vehiculos an dinarakop kan law enforcers huli sa pagbalga sa mga health and safety protocols kan IATF.


Na enot kaini, si Police Major Louie Dela Pena an opisyal na parataram kan PNP provincial office sa Camarines Sur nagpahayag na nakaabot man sa sainda an kaparejong reclamo asin nagcoconducir na sinda nin inbestigasyon.


An border control sa Del Gallego, Camarines Sur pigbugtak kan Capitolyo Provincial asin igwa man personajes an City Hall kan Ciudad nin Naga nganing mabantayan an mga returning residence sa Camarines Sur asin sa Naga hale sa National Capital Region asin estrictong iimplementar ninda an guidelines kan IATF.


Afuera kan personajes kan City Hall asin Capitolyo Provincial yaon man an grupo kan personajes kan LTO asin PNP CamSur. (dpa)