JAPANESE CORPORATION: Mapatugdok waste-to-energy projects sa Naga

Ipapadagos kan lokal na gobierno kan Ciudad nin Naga an enot na plano na magkaigwa kan Waste-to-Energy (WTE) project asin puede magkolecta pa nin basura sa pagtaraid na banwaan kan ciudad mantang igwa nang Japanese Corporation nag-oopresir kan saindang proyekyo.


Si Engr. Joel Martin, jefe kan Solid Waste Management Office (SWMO) nagkumfirmar na nag-atubang na sainda ni Consejal Salvador Del Castillo, pamayo kan Committee on Environment kan SP an representante kan korporasyon na dai paman nginaranan.


Dai palang nahahaloy nag-atendir sa committee hearing an representante kan Japanese Corporation na nagpaliwanag kan saindang proyekto na kaipuhan an sagcod sa 300 na toneladang basura aroaldaw nganing makaproducir nin enerhiya. An proponente pinapasumiter na kan project proposal nganing adalan kan ciudad.


Sa presente kun digdi sa Ciudad nin Naga, nakakacolecta an SWMO nin 120 tonelada aroaldaw na basura alagad kakayahon an 300 tons aroaldaw alagad maako na an ciudad kan mga basura hale sa mga banwaan kan Metro Naga Development Authority, sabi pa ni Martin.


Sinabi ni Consejal Del Castillo an proponente iyo an ma-install asin operate kan WTE project, sinda an ma provide kan funding. Mabayad an City Hall kan tipping fee per ton of garbage disposal asin sa facilidad.


Dinagdag pa ni Martin an konstruksyon kan facilidad sa WTE, mga ekipahes, asin iba pang gagastosan aaboton nin labi sa Php1 bilyon nganing makumpleto para sa operasyon kan proyekto.


Igwa nang kaparejong waste-to-energy project sa saindang nasyon asin padagos na an operasyon, sabi pa.


Saiya pang sinabi an mga residente kan ciudad kabale sa makikinabang kan proyekto sa lado nin trabajo, pagbaba kan singil sa tarifa sa kuryente mantang tabang pa sa pagtaraid na LGUs na mayo pa nin sadiring bagsakan nin basura.


Igwa nang seguradong duwang hektarya an ciudad sa presenting Sanitary Landfill sa barangay San Isidro alagad an kontruksyon kan WTE project puedeng matapos sa laog nin duwang taon.


Sa ngunian an presenting sanitary landfill limitado sana huli ta puedeng mapano sa laog nin duwa hasta sa limang taon asin magiging solusyon na an WTE.


Kun madagos an sinambit na facilidad an Ciudad nin Naga iyo an pinakaenot sa Bicol na an basura puedeng ikunberter sa enerhiya. (dpa)