Jeepney P13 versus Trimobile P15

Realidad o Nagka tiempo sana, na mas paborable na magkayod nin Jeepney ta tambak an pasahero, nag aaragawan pati. Barato kaya an pamasahe keysa sa Trimobile na uminolanto sa P15 an minimum fare. Nagkakaperang driver kan jeepney sa Magsaysay na mina ag isa mga escuelahan sa francia an nag ngingirit ngirit ta sinda an pig lalamag lamag kan mga estudyante ta P11 sana ang bayad ta kan sarong simana pig tugot na kan City an petiyon kan mga drivers asin operators kan Trimobile asin Etrike na ilangkaw abot sa P15 an minimum fare asin ang discount sa SC asin student P12. An makangalas kaya ta may nagkakaperang trimobile drivers ang nahilingan kan mga pasahero nin dai pagka kuntento sa P15 ta mantang nagpapa ro-ab kan saindang lunadan sige an yamotam na kesyo naglangkaw man kutana an pasahe, dai man daa nagbababa an presyo kan gasoline kaya sa pagbayad kan estudyante nin P12 nagpipiling piling an driver na dai nin konsiderasyon. Marhay man nanggad an ibang driver kan Trimobile na pano nin respeto asin konsiderasyon ta maski estudyante asin gurang an lunad, ini magalang asin iyo na mismo an nagsasabi na P12 sana an pamasahe, an saindang rason iyo na igua man sinda nin mga aki na estudyante asin mga magurang na senior citizens na dapat tawan nin fare discount. Si Lando taga Bagacay duman sa Tinambac, driver siya nin Jeepney Magsaysay, sige an ngirit mantang pig paparagutnot an matagas na manibela kan saiyang jeepney ta magpoon daa kaya na ilangkaw kan City hall an pamasahe sa Trimobile, nagdakul an bilang kan mga estudyante na mas gustong maglunad sa Jeepney ta mas barato an pamasahe. Kan premirong aldao na ipasunod an P15 sa trimobile, haros dai ako makatubod na igua pa nanggad trimobile driver na kinukulangan sa kwarta, minsan nagsakay ako pasiring sa Bagumbayan Sur, asin kan ako magduhol nin discounted na P12, tolos nagyamotam na kesyo daa P15 an pamasahe. Kung sabagay namaluan pa akong Matinee Idol mantang haloy na akong nag celebrar kan pagigi kong SC. Kan sabihon kong saro akong SC, nagpiling piling ta gusto pirme sanang P15 an saiyang makapotan. Niyako, iyo ini an klase nin mga driver na masakit lunadan ta ini mapili nin pasahero ta ang gusto pakyawan an pasahe. Dai man lang maka arog sa Mister ni Manay Fe na paratienda nin buko sa Mac Mariano na desiplinado, magalang sa pasahero asin dai nagsasayuma sa mga nagpaparang pasahero, bakong arog kan iba, na kun dai gusto an destino ini mayong sabi sabi na minapa ro-ab kan trimobile. Saro sa malinaw na epekto kan P15 pamasahe sa trimobile iyo an pag nagpaparada magkasabay an Jeepney asin Trimobile sa gate kan NCF, an mga Nceans marikas pating nagsasarangkay sa Jeepney sa risadong rason. Makaherak man sa ibang trimobile drivers na toltol man kutana, asin magalang alagad mas ginusto kan ibang mga estudyante na maglunad sa Jeepney ta mas tipid sinda nin piso. An Trimobile saros a tatak kan Ciudad nin Naga ta iyo ini an naging Hade kan tinampo na nakatabang sa pag asenso kan ekonomia kan Naga magpoon na ini magkayod sa Naga kan 1967.