Jefe kan BMC maretiro na

Dai na ma-sarong bulan sa serbisyo sa gobierno si Dr. Francisco Sales III nakatalaan nang magretiro bilang medical director kan Bicol Medical Center (BMC) sa huring semana kan masunod na bulan nin Oktubre 2021.


Pig-aandaman na ni Sales an mga dokumento kan saiyang opisina na ipapasa sa matukaw na Officer-in-Charge an saiyang assistant medical director Mary Jane Uy.

Napag-araman kan Bicol Mail an mga asperante sa mababakante puesto hale sa laog kan BMC kinababalihan ninda Dr. Ronnie Gregorio Gigantone na sarong surgeon, Dr. Jensy Ong, Chief Training Officer, Dr. Mary Jane Uy asin igwa hale sa luwas pigngaranan na Dr. Roberto Sarmiento, medical director kan Mother Seton Hospital.


Si Sales, nanombrahan na permanteng jefe kan pinaka-dakulang hospital sa Bicol sa presenting administrasyon ni Secretary Francisco Duque kan Department of Health.


Siya iyo an nagsalo kan mga controvercia sa saiyang pigribayan na medical director na saro sa natuyawan iyo an kapabayaan na matapos sa tamang panahon kan construction firm an bilyones peso na bagong mga edificio kan BMC.


Pigpunan an proyekto sa administrasyon ni dating Presidente Benigno Aquino III inaabot na sa administrasyon ni Presidente Rodrigo Duterte sagcod na pignombrahan si dating Juez Marvel Clavecilla bilang Presidential Adviser for Bicol Affairs.


Si Clavecilla asin an saiyang executive officer Tammy Lee asin dipuntong PACC Chairman Dante Jimenez nagtarabang sa pagsukit kan mga controvercia sagcod sa pagkulit sa kontratista na taposon na an 5th asin 8th storey building.


Si Sales, nagplanong magretirong amay bilang medical director huli sa pakiaram kan ibang politico alagad pinugolan ni Usec Clavecilla nganing taposon an saiyang serbisyo sa gobierno.


An pagkaigwa nin bagong darakulang edificio kan BMC iniciativo kan nagretiro medical director Dr. Efren Nerva na saiyang nahagad an multi-billion peso na proyekto ki dating DOH Secretary Enrique Ona, sa administrasyon ni dipuntong Presidente Aquino III. (dpa)