Jefe kan PNP pinatanidan an mga pulis sa ilegal na actividad

Pinatanidan kan jefe kan Philippine National Police sa nasyon an mga miembros kan PNP na dai maging envuelto sa ilegal na droga, ilegal na sugal, dapat disiplinado sa trabajo, magtrabajo nin toltol bilang mga awtoridad.


Ini an mga pahayag ni PNP Chief Rodolfo Azurin Jr. sa saiyang pagbisita sa Camp Semion Ola, Ciudad nin Legazpi. An jefe kan PNP nagpaapod nin command conference sa mga provincial director, jefe de pulicia sa mga Municipal Police Station asin mga halangkaw na opisyal kan Bicol PNP.


Saiyang pigtawan nin ponto na dapat lambang miembro kan PNP ibitaran na magparticiar ano man na ilegal na actividades nganing maseguro na mahaloy sinda sa serbisyo sagcod na magretiro bilang opisyal kan PNP.


Sinabi pa na ipapadagos kan saiyang liderato an giyera laban sa droga alagad mapaluwas an saiyang opisina nin bagong direktiva sa kampanya kontra sa sinambit na ilegal na actividad sa irarum kan kamawotan sa administrasyon ni Presidente Ferdinand Marcos Jr.


Si Azurin nagsugo sa Camp Semion Ola kaibanan an saiyang esposa asin aki, mainit na sinabat ni PBGen Rudolph Dimas na nagbiklad man kan acomplisimiento kan Bicol PNP na nagbaba an crime rate.


Mientras tanto sa saiyang mensaje sa mga rebel returnees dapat dai sinda mag-alangan kun ano an mga kaipuhan nganing maging matrangkilo an saindang buhay envez na makipag-giyera sa gobierno.


Katakod kaini, inalok niya an aktibo pang miembros kan New People’s Army sa rehiyon na dapat magbalik na sa gobierno mantang igwang seguradong ayuda para magpadagos kan saindang matuninong na pagbuhay kaibanan an saindang familia. (dpa)