Joint operations vs nagbabalga sa ley trafico ginibo sa Pili, CSur

Tanganing maseguro an road safety sa Pili, Camarines Sur an Land Transportation Office (LTO) Extension Office na pinamamayohan ni OIC Frederick Torrecampo nagpapadagos kan saindang joint operations sa Maharlika Highway sa Cadlan para estrictong implementasyon sa mga ley sa trafico.

Kabali sa operasyon iyo an personajes kan Highway Patrol Group (HPG), PNP, asin Regional Law Enforcement Officers kan ahencia Region V.

Sa operasyon poon kan Febrero 1 hasta Febrero 19, 2024 maabot sa 120 individuals nagkadarakop na mga traffic violators, 23 unlicensed, 24 unregistered motor vehicles 38 seatbelt law, 25 dai nagsusulot helmet or Helmet Law, 1 Child Safety on motorcycle (1129), asin 94 sa Transportation Law or RA 4136.

Sinabi ni Torrecampo an saindang operasyon nganing maseguro an road safety para sa karahayan kan publico orog na an tsuper alagad kun magpapasaway dai sinda makakalibre sa awtoridad.

An ibang mga traffic violators na papuli sa kabesira kan provincia nasasara na sa linderos kan Ciudad nin Naga kun nagkakaigwang one-time big-time checkpoint an Naga City Police Office.

Dai naman pigbuyagyag kan LTO Extension Office kun nuarin mabuelta an saindang joint operations mantang ano man na oras nabuelta sinda sa national road sa kaparejong misyon.

Mientras tanto, kan nakaaging Febrero 17-18, 2024 pinadrenohan kan extension office an libreng ‘‘Theoretical Driving Course’’ sa Barangay San Isidro, Pili, Camarines Sur nganing hasaon an indibidwal kan saindang skills an seguradong pagmanijo na harayo sa peligro.

Afuera kan saindang kampanya sa road safety nganing matukdoan pa na maging responsable sa pagmamanijo asin maibitaran an aksidente sa trafico.

Kampanya kan LTO sa road safety magpapadagos sa paagi kan joint operations kabali digdi an PNP, HPG asin Regional Enforcement Team kan ahencia.