Jovenes sa Agrikultura

Malinaw na realidad sa sektor kan agrikulura ang pag-edad kan satong mga paraoma asin mga parasira. Ang average na edad kan satong mga paraoma yaon sa 57 hanggang 59 años.Sa English, “they are not getting any younger”, ta sa paglawig kan buhay sisay man baya ang dai magurang? Sa sarong adal na ginibo kan taon 2020 ni Florencia Palis kan University of the Philippines Los Baños, lampas 65% kan Pilipinong paraoma dai nagmamawot na magsunod sa pag-oma ang saindang mga aki sa rason na ini mapagal asin maluya ang kita.

Segun sa Philippine Statistics Authority (PSA), ang mga jovenes (edad 15 hasta 29 años) yaon sa 8.9% kan mga agricultural operators, kadaklan yaon sa mga may edad nang grupo. Boot sabihon kan numero istadistikang ini, hababa ang posibleng populasyon kan sektor na direktang makakaapekto sa food security kan satong nasyon.

Kan nakaaging Pebrero ngonyan na taon, nagpoon na liwat ang pagpreparar nin budget ang mga opisina ka lokal na gobierno kan Ciudad nin Naga. Kaayon ang City Agriculture Office (CAgO) kaibahan ang ibang opisina kan lokal na gobierno sa Economic Cluster. Sa sarong pagtiripon kan cluster, pakatapos magpresentar nin CAgO kan proponidong budget, nabuksan ang orolay nin pag-enganyar kan jovenes sa sektor nin agrikultura. Nasabi na ang direksyon kan jovenes parayo sa agrikultura, alagad ang mga pa-retiro na sa trabaho, nagrarani sa pagtanom. Ang mga ma-retiro ang may kakayahan mag-kapital, mag-invest sa pag-oma. Mayoriya sainda, nag-iistoria na matanom-tanom na sana sinda sa bukid, panlibang-libang.

Mawot ta sa agrikultura, pagtanom man o pagsira, magkita. Ang mga jovenes ang masalida sa sa sektor na ang presenting henerasyon nag-eedad na. Sa mga ma-retiro, bako nang gayong kita ang lamag kundi paglibang na sana. Sa pagpadagos kan orolay kan cluster, nagluwas ang punto, dai na pagpiriton ang jovenes, tawan atensyon ang mga nagdudulok asin mga may interes sa sektor. Si mga ma-retiro, tawan direksiyon na magkita ang ang pagtanom o pahahayupan.

May mga lakdang man ang CAgO kung pano maenganyar ang jovenes na maparani asin magka-interes sa agrikultura. Saro na ang pagtao nin mga seminars asin trainings sa mga eskwelahan kaibahan ang pagtukar kan papel kan sektor sa pag-asegurar kan suplay nin kakanon. Sa laog nin halos limang taon, nagtatao nin technical assistance ang opisina sa mga kinokondusir na research nin mga estudianteng nasa Junior asin Senior High School kan mga manlaen-laen na eskwelahan. Saro sa pirming nakonsulta sa opisina ang Naga City Science High School. Masasabi na may pakinabang ang saindang mga research, may maitatabang nanggad sa sektor na mapagal asin maluya ang kita.

Idagdag ta ang mga taunan na grupo nin mga estudianteng nasa saindang OJT, internship o work immersion program, yaon man ang Summer Employment for Enrollment (SEFE) asin Special Program for the Employment of Students (SPES) kan Metro PESO. Saro sa mga maogmang bareta para samuya, may mga estudiante na nagpadagos mag-college asin nagkua nin kursong agrikultura, may saro ngani na licensed agriculturist na. Ang sektor kan agrikultura padagos sana asin dai nawawaran nin pag-asa. Ang kakanon dai mawawara sa uso, hanggang may nagugutom, dai mawawaran importansya ang agrikultura!

Pag-apreciar. Ang sukol nin pagtubod nagluluwas sa marhay na gibo, pagheras, pagmakulog sa kapwa asin pangangataman sa kapalibutan. An sukol nin pagiging lider yaon sa kakayahan mag-inspirar asin mag-motivar kan kada saro. Ang pag-inspirar kan sarong lider segun sa saiyang gawe asin pagbuhay. Sa kagsurat kan “Laudato Si”, an lider kan Simbahang Katolika, Pope Francis, na nagtalikod na sa kinaban- Requiescat in pace.