Juelga nin transporte sa Bicol kanya kanyang desisyon
Nagkakabaranga na an sektor nin transporte sa Bicol kanya-kanyang desisyon sa pagparticipar sa pigtalaan na tolong aldaw na juelga nin transporte poon kan Lunes, Noviembre 20 mala ngani an ibang grupo sana nin mga jeepney sa Albay an activong nag-sabay alagad igwa man nagsinutil na saindang nang sinsikwal an protesta sa isyu sa PUV modernization.
Kun dati activo an mga lider kan sektor sa Kabikolan an provincia sana kan Albay an nakisabayan sa nationwide ‘‘tigil pasada’’ sa pangapodan kan grupo ninda sa Metro Manila na pinangenotan kan Pinagkaisang Samahan ng mga Tsuper at Operator Nationwide (PISTON).
An Camarines Sur asin Ciudad nin Naga na dating activo an saro sa saindang lider na si Joel Pillogo kan Condor-Piston dai na makontak nganing makuanan nin reaksyon kan media alagad si ibang organisasyon na rehistrado na sa Cooperative Development Authority nagkumfirmar na dai na sinda masabay huli ta apektado an saindang hanap buhay.
An grupo sa Albay nagpahayag na nasa 90 porcientong saindang naparalisar si transportasyon alagad an saro sa dakulang grupo kan Tabaco-Legazpi Transport Cooperative o TALETRANCO dai nagsabay sa juelga mantang igwa pang ibang solusyon an isyu sa jeepney phase out maging an Bicol Intercity Transport Cooperative (BITCOOP) dai na nagparticipar.
An mga juelga nagpahayag na padagos nindang pigcocontra an PUV modernization huli kan inaabot sa labi sa dos milyon pesos an cantidad kan sarong unit asin dai kaya kan saindang bulsa asin sainda pang kinokontra an franchise modernization na sagcod na sana san Deciembre 30, 2023.
An PNP sa Albay nagpaluwas kan saindang quincing patrol car para sa libreng sakay nganing gamiton kan apektadong pasajeros mantang sa PNP Camarines Sur asin Naga City Police Office nag-andam kan saindang vehiculo alagad mayong nangyari juelga digdi.
Sinabi pa kan PNP na dai man totalmenteng narapalisar an juelga mantang sa huring mga aldaw dikit na an nagbali.
An Ciudad nin Naga, Camarines Sur asin Albay nagsuspendi kan saindang mga klase sa pribado asin pampulikong escuelahan huli sa anuncio sa juelga.
An mensaje kan saindang lider na si Alex Banares, nagsisimpatiya sinda sa mga sentimiento kan ibang miembros kan sektor nin transporte alagad naheheling ninda na igwa pang ibang epektibong solusyon.
Pinahayag man ni Javier Moral lider kan kaparejong sektor sa kan Legazpi-Daraga Association mayo nang nangyayaring toltol na koordinasyon sa sainda an mga organizers kaini sa Manila nin huli kaini, kanya kanya nang desisyon kun masabay sa protesta laban sa PUV phase out.
LIBRENG SAKAY. Mga patrol car kan PNP sa Albay nagruluwas nganing magpasakay nin libre sa mga pasajeros na apektado kan juelga nin transporte. (PNP Kasurog Bicol)