Jueteng sa Naga dapat ipapundo na kan NCPO

Panahon nang mag-aksyon si P/Col. Marlon Catan, City Director kan Naga City Police Office (NCPO) na darakupon an mga kuryador sa operasyon kan ilegal na sugal na jueteng sa mga barangay kan ciudad.

Kan administrasyon ni dipuntong Alcalde Jesse M. Robredo asin dating Alcalde John Bongat dai nagdadanay an ilegal na sugal huli sa estrictong kampanya kan NCPO nganing dai makalusot an koleksyon sa jueteng

Si Liga ng Barangay President asin ex-officio member kan Sangguniang Panlungsod, Consejal Antonio ‘‘Dodith’’ Beltran sa entrevista kan Bicol Mail sa paagi nin telepono nagpahayag na saiyang inaapodan nin atensyon si Col. Catan na dapat darakopon kan miembros kan pulisya kan ciudad an mahiwas nang koleksyon sa sugal na jueteng.

Saiyang sinabi an mga kuryador ginagamit an betting slips (papelitos) sa STL asin ini sarong ilegal na sugal pagbalga kan Presidential Decree 1602.

Nagpatanid man si Beltran na dai na halaton kan City Director magpasar sinda nin resolusyon sa Sangguniang Panlungsod ngani sanang magpaluwas nin direktiva na ipapundo an ilegal na sugal.

Nakaabot man an report sa pamayo kan Liga na igwa nang mga nadakop an NCPO asin CIDG Camarines Sur nin mga kuryador na base sa record pigbisto an mga suspechado na sinda Nolan Salon y Cabal, 54, dispatcher asin residente kan Brgy. Bagumbayan Sur, Ciudad nin Naga. Nadakop siya kan Hunyo 9 sa North bound terminal.

An tolo pang iba nadakop sa Zona 2, Igualdad na pigngaranan na sinda Josep Asignado Sr., 57, sarong sales supervisor/Kabo, kan Brillante Compound, brgy Sabang, Marvin Asignado y Belason, 23, kuryador kan Zona 6, Abella asin Manuel Panganiban y Magdasoc, 55, kuryador taga Zona 5 Igualdad.

Sinda anas envuelto sa STL/bookies sa Ciudad nin Naga asin nakumfiscar sa sainda kan mga awtoridad iyo an mga pataya sa sugal, calculator, notebook, ballpen, stapler asin iba pang mga paraphernalia.

Sinda sinangatan na nin caso sa pagbalga kan PD 1602 na enmiendado sa RA 9787.

SA PCSO CAMSUR

Si Provincial Manager Jobet Ramos kan Philippine Charity Sweeptakes Office nagpahayag na igwang permit an operasyon kan STL sa Camarines Sur alagad kun igwang mga pataya sa Ciudad nin Naga iyan ilegal na ginagamit na prontera an STL.

An operator kan STL naghagad nin business permit sa opisina ni Alcalde Nelson Legacion kan nagtalikod na taon alagad sinayumahan. Huli kaini, si STL Betting Station binalyo sa Pili, Camarines Sur.

An PCSO nag-apelo na sa NCPO na darakopon an mga ilegal na kuryador nganing dai ma-apektaran an legal na operasyon kan STL. (DPAureus)