Ka-Fuerte, Ka-Swerte



Sa mga oras na ini dai pang kasiguruhan kun malaban para gobernadora sa Camsur si VP Leni o an saiyang aki na nag-eskwela sa Harvard na si Aika.


Pero an segurado na si Luigi Reyes Villafuerte iyo na an pambato kan puderosong Villafuerte family para gobernador kan Camariner Sur sa 2022.


Siisay an mahuna na puedeng si dating vice-gobernor Ato Peṅa iyo an magsabat ki Luigi? Nagugulpi na pati si Ato sa akusasyon kan ibong na lado na siya daa sarong hipokrito.


An balwarte ni Ato iyo an Partido district ta siya namundag sa banwaan nin San Jose, nag-istar sa Goa, naguin general manager kan Casureco IV asin ngonyan residente kan capital town na Pili.


Bakong makangalas na an dating vice-gobernor maglaban para gobernador ta kalificado man pating marhay.


Duman sa Partido si Congressman Arnie Fuentebella seguradong magkakaigwa man giraray nin kalaban guikan sa pamilya Villafuerte o Magtuto.


Sa 3rd district kabali an Naga bakong makangalas na magsabatan liwat si David asin Goliant, si Gabby versus si LRV. Si Joel Cadiz sawong-sawong.


Sa 1st district permi nang si Nonoy Andaya para congressman, baad tumangan siya kan saiya man sanang pinsan na si Warren Seṅar.


An 2nd district na kinababalihan kan pinakadakulang banwaan na Libmanan asin an nakatukaw na deputado iyo si LRay Villafuerte. An paghuna kan iba mayo nin kalaban.


Pero sa mga naheheling sa Facebook asin social media maski dai nagsasabi kan saiyang intensyon garo interesado si dating congressman Dato Macapagal Arroyo, aking nguhod ni dating Presidente Gloria Macapagal Arroyo, nagserbing tolong turno bilang congressman kan nasambit na distrito, nag-eskwela asin nagtapos nin kolehiyo sa Ateneo de Naga University, matibay magtaram Bikol daog-daog pa ngani si Nonoy Andaya, maboot asin dai tataong magtabuga. Pighahangay siya bako lang kan mga taga-segundo distrito kundi kan mga taga-Camarines Sur.


Dai kita mabigla kun sa maabot na bulan na Oktubre magplantsar kan saiyang kandidatura, para gobernador o congressman si Dato Arroyo.


An pinaka-pighahalat kan kadaklan an Batalya sa Rinconada entre kan nakatukaw na gobernador na si Luis Miguel “Migs” R. Villafuerte kontra sa kun siisay man na taga-Rinconada, Alfelor o bako.


An campaign manager daa iyo an mag-agom na congressman/woman JoSal Fortuno.


Primero ini sa estorya na bakong taga-Rinconada an malaban para representante kan dakulaon na distrito.


Ka-Fuerte kuta kun magkasararo an pamilya Alfelor---si Mayora Madel, si Atty. Peachy saka si Nonokoy plus si Bokal Rupert, tanganing maaraman kun gurano kahurugos an mga taga-Rinconada.


An Rinconada bistado na pinakarelihyosong mga tao sa Camarines Sur.


An sabi kan mga nagmamasid lalo na kan mga taga-media asin political analysts, maski pa manggarana an mga kalaban kan Villafuerte sa mayoriya kan mga distrito pero kun si LRay pa an manggana sa segundo distrito dominante man giraray an mga Villafueret ta garo malakas pati si Congressman LRay sa Malacaṅang saka sa mga Cayetano asin mga Marcos.


Haros tapos na an eleksyon sa ibang provincia kan Bikol arog kan Cam. Norte, Sorsogon, Albay, Masbate asin Catanduanes pero Ka-Fuerte kan bakbakan digdi sa Camarines Sur.


Ka-Fuerte, Ka-Swerte.


Ka-Dimalas?