Kaalyado ni Gob Villafuerte, administrator na kan LGU Pili

Pili, Camarines Sur --- Si dating bise gobernador asin kaalyado ni Gobernador Migz Villafuerte, Fortunato ‘‘Ato’’ Peña nagtutukaw na bilang Municipal Administrator kan lokal na gobierno kan kabesira kan provincia nin Camarines Sur.

Kinumfirmar sa Bicol Mail ni Alcalde Tomas Bongalonta na an nombramiento niya ki Peña epektibo ngunian na Enero 2021 asin saiyang orgullo na magiging katuwang niya sa LGU an dating bise gobernador na nagserbe sa provincia sa laog nin tolong termino, dating provincial budget officer, dating general manager kan Camarines Sur IV Electric Cooperative asin nagserbe nin halipot na panahon sa central office kan Department of Interior and Local Government bilang consultant.

Nagtutubod an ibang politico sa banwaan nin Pili na an dating bise gobernador iyo an magiging ka-tandem ni Bongalonta sa maabot na eleksyon lokal sa 2022, alagad dai man ini kinumfirmar kan alcalde envez prioridad muna an trabajo mantang igwang marhay na kabatiran sa plano asin trabajo sa gobierno.

Alagad nabigla an ibang mga kaalyado ni Villafuerte sa Capitolyo Provincial kun panong yaon na ki Alcalde Bongalonta na bakong kaalyado sa politica kan joven na gobernador.

Sinabi kan alcalde an dating bise gobernador marhay na amigo na saiyang nakaibanan sa Philippine Red Cross (PRC), Camarines Sur Chapter sagcod na dai sinda nadificilan na imbitaran na maglaog sa LGU Pili.

Si Consejal Marcel Lopez ipinahayag na iyo an nag-imbitar ki Peña nganing gibohon Municipal Administrator na dai sinda nadificilan nganing takmaon an pig-oopresir na posisyon dawa na ngani aram na si Bongalonta bakong kaalyado kan gobernador.

Magigirumduman si Peña kan pataposon na an saiyang ika-tolong termino bilang bise gobernador nagdemiter sa puesto nganing nombrahan ni Villafuerte bilang provincial administrator alagad dai nahaloy sa puesto sagcod nagbalyo sa central office kan DILG. (DPAureus)