Kabisera kan CSur, duwa an alcalde

Pili, Camarines Sur --- Apektado an mga transaksyon sa banwaan na ini sagcod na dai nareresolberan kan Malacañan an duwang alcalde na parejong nagpapaluwas nin memorandum sa mga department head na sinda an jefe ejecutivo.

Sinda elehidong Alcalde Tomas Bongalonta asin nakatukaw na bise alcalde asin nagtukaw na acting mayor Marivic Solano, parejong may mga pinupugolan na dokumento na magtukaw bilang pamayo kan kabesira kan provincia.


Siisay an dapat na midmidon sa mga pirma sa ano man na transaksyon maging tsikie sa bangko asin sueldo kan mga empleados, ini an mga kahapotan kan mga department head asin iba pang opisyal kan banwaan.


Si sinuspending Alcalde Bongalonta nakarecibe nin memorandum kan Marso 8 hale sa DILG Bicol na pinapabuelta siya sa puesto huli kan ‘‘Stay Order’’ kan Malacañan.


Ini bilang aksyon sa saiyang petisyon sa Malacañan sa duwang bulan na prevention suspension ni Gobernador Migz Villafuerte sa caso administrativo na pigcucuestion kan balik sa puestong jefe ejecutivo huli kan suboot mayong basehan an mga akusasyon kan complainant na si Ailen Ceron, municipal accountant kan LGU.

Kan magbuelta sa posisyon si Bongalonta bitbit niya an memorandum hale ki DILG Regional Director Anthony Nuyda sa paagi kan DILG central office na nagsugo sa ‘‘Stay Order’’. An memorandum pigdistribuer sa mga department head asin sa Municipal Police Station kan Pili, CamSur.


Alagad si acting mayor Solano nagpadara man nin memorandum sa mga department head asin PNP na siya magpapadagos na acting mayor kan LGU Pili nin huli ta may cuestion legal an memorandum kan DILG Bicol.


Si Solano igwa man nakakaputan na dokumento petsado Marso 2, 2021 na pirmado ni Bryan A. Aracosta, deputy executive secretary for legal affairs kan Malacañan na memorandum na tinatawan nin 15 diyas sinda Gob Villafuerte, Bise Gobernador Imelda Papin na magkomento sa petisyon kan suspendidong alcalde asin tano ta dapat ibasura an petisyon.


Igwa man kopya si Bongalonta na pinapa-komento sa laog nin 15 diyas kun tano ta dapat ibasura an preventive suspension kan gobernador.


Sa pagtubod na an may jurisdiksyon sa caso iyo an Legal Affairs kan Malacañan, si Solano nakatukaw pa bilang acting mayor.


An caso ni Bongalonta, sinangat ni Ceron huli sa pagpadagos sa puesto sa Municipal Administrator apesar na mayong ‘‘concurrence’’ an Sangguniang Bayan.


Sa Viernes, Marso 19 pigtalaan an clarificatory hearing sa Sangguniang Panlalawigan kan Camarines Sur kun ‘‘guilty’’ sa caso an nasa preventive suspension na alcalde, sabi man ni Vokal Angel Naval. (dpa)