Kabisera kan CSur duwa nagtutukaw na alcalde
Liwat naman nagkaka-urokag an pagpadalagan kan lokal na gobierno kan Pili, Camarines Sur sagcod na dai nareresolberan na duwang alcalde an namamayo kan LGU puon kan Lunes, Septiembre 6 matapos mag-take oath na bilang acting mayor si bise Alcalde Vicvic Solano.
An controvercia matapos iimponer na ni Gobernador Migz Villafuerte an anom na bulan na penalty suspension contra ki Alcalde Tomas Bongalonta huli sa caso administrativo, alagad nagsayumang maghale sa tukawan sa dahilan na igwa pa siyang motion for reconsideration.
Si Solano nag-take oath na sa puestong acting mayor sa sarong barangay kapitan kan Viernes, Septiembre 3 asin saiyang pigsunod an rule of succession bilang elihidong bise alcalde.
Sa Sangguniang Bayan, si topnotcher Councilor Francis Belen na iyo an dapat mag-asumir bilang acting vice mayor alagad nagsayuma na magtukaw sa rason na saiya pang pigmimidbid si Bongalonta bilang jefe ejecutivo mantang igwa pang pendienteng motion for reconsideration.
Si Bongalonta nagtutubod na pulitika sana man an motivo kan Capitolio Provincial mantang kan nakaaging eleksyon lokal dinaog nin 6 mil na voto an gobernador.
Alagad sinabi man ni Vokal Angel Naval, chairman kan Committee on Administrative cases sa Sangguniang Panlalawigan na nagbase sinda sa mga evidencia kan caso asin kun gustong cuestionon kan alcalde an saindang desisyon igwa siyang diretso na magsangat nin MR.
Sa tahaw kan controvercia sa pagka-igwang duwang alcalde sa kabisera kan Camarines Sur apektado an mga transaksyon sa bangko mantang cuestionable kun siisay an dapat midbidon na jefe ejecutivo.
Alagad sinabi ni Bongalonta na nagsurat na siya sa saindang depository bank na siya pa an alcalde sa saindang banwaan nin Pili, Camarines Sur.
Nakatalaan man magpadara nin surat sa bangko si Solano nganing inpormaran an saindang bangko na siya na an nagtutukaw na acting mayor.
Kun magkaigwa nin problema sa transaksyon sa cuarta sa bangko ciertong an apektado naman an sueldo kan mga empleados lalo na si mga casuals asin job order maging an iba pang mga basic services kan LGU. (dpa)