Kadiwa simbag sa inflation rate
Yaon na sa proceso an City Agriculture Office (CAO) kan Ciudad nin Naga sa itutugdas na Kadiwa Center na makakatabang laban sa inflation rate alagad maabala sana nin dikit na panahon nganing makumpleto an mga produkto na mababakal sa hababaong presyo.
Igwa nang mga pag-andam nganing ilansar an programa sa Abril 30, 2023 na aatendiran nin mga imbitadong bisita hali sa Department of Agriculture (DA), Bureau of Fisheries and Aquatic Resources (BFAR), National Food Authority (NFA), sa lado kan City Hall papangenotan ni Alcalde Nelson Legacion, mga consejales kan ciudad asin paraoma, sabi ni CAO consultant Julian Lavadia Jr.
An programang ini kan lokal na gobierno nganing makataong kasimbagan sa halangkaw na presyo kan mga mayor na produkto sa mercado.
Si Lavadia iyo an designadong focal person ni CAO Officer-In-Charge Frank Mendoza para sa sinambit na programa padagos an coordinasyon sa mga opisina kan BFAR, opisina rehiyonal kan DA, NFA maging iba pang mga paraoma na ma-aangkatan nin baratong gugulayon.
An Kadiwa Center, segun pa ki Lavadia makakatabang sa mga residentes kan ciudad sa tahaw kan paglangkaw kan inflation rate sa Bicol na nagsakat na sa 8.3 por ciento.
An gobierno sa paagi kan Department of Agriculture sa Bicol igwa nang Kadiwa Center sa laog kan natad kan ahencia sa Barangay San Agustin na naging paborable sana sa mga residentes kan banwaan nin Pili, Camarines Sur.
Igwa nang 30 mga cooperativa nin paraoma sa Bicol an natawan ayuda pinansyal kan DA para sa pagtugdas kan Kadiwa Center asin dai pa kabali an Ciudad nin Naga.
Dinagdag pa ni Lavadia na katuwang ninda afuera kan ibang mga ahencia de gobierno iyo an food producers bilang mga agripreneurs na directang mapabakal kan preskong produkto pasiring sa consumedores.
Sa inisyal na listahan kabali sa mga produkto na makukua sa Kadiwa iyo an mga aroaldaw na pigcoconsumo siring kan bagas, asukar, cooking oil, karne, chicken, preskong sira, alang na sira, mga gugulayon asin dakul pang iba.
An Kadiwa Center kan Ciudad nin Naga makukua sa Organic Trading Post sa Diversion Road digdi sa ciudad. (dpa)