Kakanan Nin Masa Sa Naga

Maka hinayang pag para isip isipon na ang magayon na kaugalian nin mga kakanan sa Naga kaidtong mga nakaaging dekada an mayo na asin dai nang kasiguruhan kun makaka balik pa. Ta kung yaraon pa kutana an makalumang kakanan sa Naga, sa paghihing niyato, saro idtong tourist attraction sa ciudad na pagdadayuhon ta naiiba kung ikukuparar sa ibang lugar sa Pilipinas o sa interong kinaban. An mga kakanan iyo idtong inaapod na Tirindogan Restaurant, ini nauso kaidtong mga taon 70 abot 90. Ang Tirindogan Restaurant makukua sa mga open patio sa ground floor kan Supermarket ta yaon duman ang mga paratienda nin paksiw nin vaca asin damulag, paksiw rabut, paksiw ikog, paksiw pata na masiram sa maalsom na lubas’ asin ginagamitan sana nin stik nin barbeque. Yaon man an paratienda nin “halo”, ini an dinuguan na pig Haluan nin bihon, may kaibahan nin puto lanzon o putong tabuco; yaon pa man an kape na may mainit na pandesal na may palaman nin corned beef asin binating sogok. An mga luto anas masiram asin malinig kung kaya dinadayo nin mga empleado sa banco asin mga oficina na ang iba naka kurbata, yaon man an mga kababaihan na nakikihalo man sa karakanan ta masiram na barato pa. Dai man malilingawan ang New China Restaurant lalo na kan buhay pa si Mr. Wong ang Ama kan New China. Nauso digdi ang kurahaw ta mayo pa kaidto nin computer kundi sa saimong pag order, ikinukurahaw sana asin makangalas ta iyan nasasalo kan kusinero sa laog. Maogma mag mirindal sa New China ta tiripon ang magka trabaho asin nag iirestoryahan mantang pig aakab an masiramon na pancit guisado na may tunay na bola-bola. Masiram sainda an kapeng pulis kasabay ang panlegazpi na may palaman nin keso. Mantang nag kakarakan sa New China, sige an ang ralayaw layaw kan mga gurang asin matataba na babae na may bitbit nin tiket sa Sweepstakes ta gustong magpa taya. Dai man nanggad malilingawan ang karakanan sa Atlantic Bakery ta apuera kan masiramon asin mainit na pandesal, igua pa sindang restaurant na piriot ta sadit an espasyo , alagad kadakol nin customer. Masiram sa Atlantic Bakery lalo na sa pamahaw asin mirindal an Kape. Mainit na pandesal na puedeng palamanan nin estrelladong sogok o keso, igua pa sindang masiramon na champorado na may kapartner na duwang mainit na pandesal, igua pa sindang macaroni soup asin iba pang tinapay na pig kaag sa oven. Nainot pang dekada na pinag kaguluhan man sa may likuran ni Bichara sa Igualdad an mainiton asin maharanon na tinomtoman na pig titienda sa kareta nin mag irina na amerikana pero nag iirestar sa Abella. Kung isnakan man an pag oorolayan, nagsikat man ang iskrambul asin palamig sa Plaza Rizal na ang partner iyo ang hot cake na pig lahidan nin mantikilya asin asukar. Kung ika mahilig mag tambay sa Plaza Rizal, puede kang magkawat nin chess asin dama mantang sige ang sapa’ nin salted na mani. Nagsikat man sa Naga Restaurant asin Café Candice ang inot na masiramon na Toasted Siopao na pinag ngalasan kan mga dayuhan ta ang siopao kaya nabisto bilang steam, alagad masiram palan ang toasted. Nawawara na an iba sainda kaya, makahinayang pag isip isipon na ang mga ordinaryong kakanan sa Naga, nawalat na sana sa memorya, sayang managom na, Barato pa.