Kalag ni Yamashita Nahiling Sa Cadlan

Magayon alagad nakaka pang geriyabo ang mga istorya nin mga tawong mayong ibang ginibo sa tanang buhay Kundi ang hanapon ang ma-alamat na “The Yamashita Treasure”. Ang Yamashita treasure iyo daa ang mga bulawan na natipon ni General Yamashita hale sa mga Minahan asin mayayaman na pilipino durante kan WW2.

Ang Yamashita Treasure, itinago asin ilinubong ni General Yamashita sa man iba ibang lugar sa pilipinas asin ang kada saro kan bobon na pig sarayan kan mga bulawan iguang ginibong mapa asin ang mapa iyo ang pig dara sa pagpuli kan mga soldados hapones pabalik sa Japan. Ninhuli sa mga estorya nin mga gerilya, naka abot sa mga treasure hunters na gulping bulawan ang itinago kan heneral digdi sa kabikolan asin saro na iyo ang Cadlan sa banwaan nin Pili.

Ang grupo na inaapod na Bicol Treasure Hunters Group na kinababalihan nin mga esperitista, mga parabawi, mga para hilot asin mga parasakat nin bukid nagtutubod sa sarong research study na ginibo kan saindang miembro na sarong esperitista na tubong Guinobatan Albay asin nag trabaho bilang sarong “merchandiser” sa sarong supermart sa Naga City. Sarong aldao ang grupo nagpasiring sa sarong sitio sa Cadlan ta yaon soboot duman ang mga bulawan kan hapones. Sa pag pirong nin mata kan esperetista na tubong Guinobatan, sinasabi niya sa mga pag iriba na ang saiyang nahihiling iyo mismo si General Yamashita, ini daa metizo, balbas sarado asin nagsisigarilyo nin tabaco asin naglalakaw na iguang sugkod asin matibay magtaram nin kastila.

Ang kalag ni General Yamashita, igua daang pig babalik balikan na harong sa bukid kan Cadlan kaya palan ta nag eelosyon sa sarong magayon na daraga. Ang mga treasure hunter tolos nag hanap nin mga tawong matibay sa history kan panahon nin hapon, lalong lalo na kan panahon nn kastila. Dai man sinabi sa istorya kung nag dulok sinda ki Historian Danny Gerona ta ang katuyuhan iyo na aramon ang mga apelyido kan mga familya na nag istar sa Cadlan asin duman ninda hahapoton ang apelyido kan magayon na elosyon ni Yamashita. Oras na maarman ninda ang apelyido kan gf ni Yamashita, nagtutubod sinda na sa libod kan harong kaini nakalubong ang Yamashita Treasure.

Sa ngonian dai na naiisihan kung yaon sain na ang mga treasure hunters, ang iba gurang na asin rilingawon na kung kaya,dapat ang LGU kan Pili iyo ang mag imbistigar kung siisay na daraga sa Cadlan ang naging GF ni Yamashita.