Kampanya kan Bicol PNP vs insurhencia pig-orgulyo

An Philippine National Police (PNP) sa Bicol dakula an saindang papel sa paglaban sa insurhencia na haros nagsasabay sa fuersa militar mala ngani naikurit kan Camp Simeon Ola an saindang halangkaw na acomplisimiento sa mga nagkadarakop asin napasukong rebeldeng New People’s Army.

Si PBGen. Rudolph B. Dimas, pamayo kan Bicol PNP sa saindang pinaluwas na ‘‘accomplishments report’’ sa peryodong Enero 1, 2022 hasta Deciembre 31, 2023 maabot sa 142 na miembros kan rebeldeng New People’s Army, 258 mga nagsuko asin 33 na miembros binawian nin buhay huli sa encuentro.

Nakakumfiscar sinda nin 186 assorted firearms asin 202 explosives sa saindang magkasuhay na mga internal security operations.

An saindang misyon sa rebeldeng grupo parte kan programa kan gobierno na matapos na an problema sa insurhencia sa nasyon. Ini inaapod na ‘‘Malasakit, Kaayusan, Kapayapaan tungo sa Kaunlaran’’ (MKK-K).

SA nagtalikod na administrasyon Duterte asin sagcod ngunian ni Presidente Ferdinand Marcos Jr., an programa kan gobierno sa misyon laban sa insurhencia sa paagi kan National Task Force to End Local Armed Conflict (NTF ELCAC) asin katuwang ninda digdi iyo an mga local na gobierno asin iba pang ahencias de gobierno.

Sa paaging ini napapusog an mga estratihiya laban sa CPP/NPA asin sagcod sa ngunian igwa pang mga nagsusuroko sa gobierno alagad tinatabangan pa sinda nganing magpadagos sa matuninong na pagbuhay.

Dinagdag pa kan Bicol PNP naging agresibo si saindang kampanya sa loose firearms, 614 an saindang mga nabawing manlaen-laen na kalibreng armas.

Digdi sa Bicol yaon an 9th Infantry Division kan Philippine Army na may base sa Camp Elias Angeles, San Jose, Pili, Camarines Sur na saro sa saindang mayor na misyon iyo an paglaban sa insurhencia alagad nakatabang pa sa sainda an PNP.