Kampanya sa ‘No Smoking’ piglansar kan DOH Bicol

Poon Hunyo 1 hasta Hunyo 30, 2024 iyo an kampanya kan Department of Health Bicol sa ‘No Smoking Month’ huli ta saro ini sa causa kan helang sa baga, epekto sa cancer, stroke maging sa heart disease, tuberculosis asin dakul pang iba.

Huli kaini, an DOH naglansar na kan ‘Wag ka nang mag-yosi, wag ka nang mag vape’ komo suporta sa kampanya laban sa helang na nakukua sa tabacco asin vape mantang sabay an ahencia sa ‘World No Tabacco Day.’

Sinabi kan DOH an dakulang epekto sa mga addict sa sigarilyo puedeng magkaigua nin kadificilan sa paghangos, pagparaabo, cancer, helang sa puso, causa nin stroke, epekto sa diabetes, sagcod na puedeng magka-problema sa immune system.

Sa Department of Education, nagsusuporta na sa kampanya nganing poon pa sana elementarya maaraman kan mga aki an negatibong epekto sa salud sa pagsisigarilyo.

An tema kan DepEd ''Protecting Children from Tabacco Industry Interference’’, pig-eenganyar kan ahencia an cooperasyon sa pagtarabangan sa laog kan familia na maprotehiran an mga jovenes sa epekto kan tabacco asin paggamit nin vape.

Haros gabos na lokal na gobierno igua na nin ordinansa sa ‘No Smoking’ sa mga opisina asin sakop kaini sa laog kan edificio sa municipal hall.