Kampanya vs ilegal na actividad, paz y orden prioridad kan bagong PD sa CSur

An pagseguro na mamantenir an paz y orden asin kampanya laban sa ilegal na juego kabali sa mga prioridad kan bagong provincial director kan Philippine National Police sa Camarines Sur.

An matuninong na lugar dakulang bagay sa programa kan provincia sa turismo huli ta dagdag pang trabajo asin makakaangat sa lado nin economia.

Ini an mga pahayag ni P/Col. Julius Cesar Domingo, PNP Acting Provincial Director kan mag-atubang sa miembros kan media sa Ciudad nin Naga. An PD primerong mag-atubang sa media matapos mag-asumir bilang acting PD sa Camarines Sur matapos kan Peñafrancia fiesta.

Sa ngunian an Camarines Sur padagos na matuninong alagad an direktiva kan PD sa mga Municipal Police Station dai magpabaya kan saindang obligasyon sa paz y orden asin laban sa kriminalidad.

Saiya pang sinugo an mga jefe de pulisiya na dapat maging marigmat bako lang laban sa kriminalidad alagad si mga ‘‘wanted person’’ dapat magkadarakop.

Afuera kan mga haloy nang wanted, nagkapera pang mga caso nin pang-gagadan sa barangay kapitan siring kan nangyari sa San Jose, Ciudad nin Iriga asin Tarusanan, Milaor masaker sagcod ngunian dai pa na-aarestar an mga responsable sa krimen.

Mawot mangyari kan jefe kan PNP sa provincia na dapat maghuros an mga nangyayaring kriminalidad sa kanya kanyang area of responsibility kan MPS nganing dai tolos maribayan an chief of Police.

Mientras tanto, pig-aandaman kan PNP sa Camarines Sur asin mga MPS an aldaw kan Undas nganing maseguro an matuninong an mga kamposanto mawarak nin kapupulisan.

Igwang idedestino sa mga check point asin national highway sa pag-monitor kan motorista na haros kadakli kan mga tawo pasiring sa mga pampublico asin pribadong kamposanto.