top of page

Kampanya vs kasulo binaba sa comunidad

An lambang opisina municipal asin provincial kan Bureau of Fire Protection (BFP) sa Bicol padagos na kan saindang ginigibong advocacia laban sa peligro sa kasulo bako sanang ngunian na Fire Prevention Month envez yaon pa an grabing init nin panahon huli kan El NiÑo phenomenon.


An opisina rehiyonal kan BFP nagpaluwas nin directiva sa gabos na sanga kan ahencia na magtarabangan sa kampanya sa kasulo sagcod sa mga comunidad sa cooperasyon kan mga opisyales lokal sundo sa barangay sa tahaw kan paglangkaw kan mga insidente sa enot na duwang bulan ngunian na taon.


Sinabi ni BFP Bicol spokesperson Sr. Inspector Edgar Tanajura sa saindang datus naglangkaw nin 26 por ciento an nailistang insidente sa rehiyon Bicol sa premirong duwang bulan ngunian na 2024.


Sa datus, nag-abot sa 119 an nangyaring mga kasulo ngunian na enot na duwang bulan kumpara sa 94 caso kan nakaaging taon sa kaparejong peryodo.


Alagad dai pa kasali si grass fire na nakadamay na madestroso si mga tinanum na gulayon.


Sa mga establisimiento nangenotan huli sa problema sa electrical mantang sa residential igwang mga napabayaan na lutoon gikan sa tanggki nin gas stove, nagkakawat nin pusporong aki asin iba pa.


Bako lang digdi sa Kabikolan naglalangkaw an insidente maging sa iba pang rehiyon huli kaini dapat maglikay asin marikmat an publico laban sa kasulo.


Sa maabot na Marso 13, 2024 magkakaigwang sarabay na fire drill an Bureau of Fire Protection sa bilog na nasyon sa mga establisimiento de negosyo.


Winalat na mga abo sa nangyaring kasulo sa pitong residencia sa Barangay Sabang, Ciudad nin Naga.

Comentários


bottom of page