Kantong Putikon



Dahil sa mga naenot kung column tungkol sa broadcast media sa Bikol, kadakul nag-aarapod sako asin nagtetext na kun igwang estorya an mga announcers sa radio asin TV dapat igwa man tungkol sa peryodiko asin mga peryodista poon kadto sagkod ngonyan.


Segun sa natipon kong impormasyon an mga diyaryo sa Naga pakatapos kan giyera mundial numero II iyo an minasunod: Bikol Star (publisher Domingo Escalante), Bikol Examiner(publisher Magno Pasadilla Sr.),Bikol Courrier(Balbino Dumaguin), Naga Times( Ramon Tularan), City News Week(Muriel Santo Domingo), Harubay(Atty. Alfredo Calara Jr.), Action News(Pako Felicedario Jr.),Bikol Banner(Teting Llagas), Bikol Free Press(Ting Barbosa), Handiong(Alfredo Tria), Balalong(Juancio F. Triviṅo), Weekly Informer(Mike Julia), Bikol Reporter(Ben Babar), Bicol Mail(Nilo Aureus), Bicol Standard(Gil Basmayor Jr.), Vox Bikol(Joe Narvadez), Bikol Tribune(Edwin Basmayor), Aniningal(Nol Saduia),Bikol Daily(Eddie Pilapil), Stardust News, Bikol News Star, Bikol Monitor(Boboy Alfelor), dakul pang iba pero bihirang magluwas kaya nagkarilingawan ko na.


An ibang mga bistadong parasurat kan panahon iyo sinda Luis G. Dato, Luis General Jr, Tito J. Levasty, Nick Prieto, Francis Naciancino Jr., Henry Briguera, Joe Perez, Joe Obias, Alfonso Ocampo, Stephen Sergio, Fred Calara, Junet Ayo, Ben Villaluz, Gumersindo Valladolid, Melvin del Puerto, Emil Saavedra, Doming Alarkon, Fronying Maristela, Tito Valiente asin Joseph Ochoa.

An ibang mga batikanong reporter iyo sinda Andy Compuesto asin Oca Azucena.


Igwa kadtong kapihan tapos inuman kan mga taga-media sa New England Resturant harani sa Plaza Rizal na pig-aapod Kantong Putikon(an orihinal).


An mga enot na estambay asin mag-amigong paratalayup iyo sinda engineer Pablo Tordilla, Dads Silvestre, Cel Lucero alyas “Latigo”, Amelito Belen, Joe Dialogo, Pete Ampoloqio, Atty. J. Antonio Carpio, Juancho Triviṅo, Noel Belangel, Atty. Alfredo Calara, Atty Luciano Maggay, Lito Garchitorina, Pepito Ojeda, Joe Orcilada, Emil Saavedra, Heli Miranda, Citong Palmiano, Direktor Crisanto Gimpaya, Roy Torrecampo, Dominador Alarcon Jr., Remegio Angeles, Ramon Brillante, Ramon San Andres, Henry Briguera, Weng Santo Domingo, Jess Fortaleza, Titoy Imperial, Tito Levasty asin Jun Capucao.


Pasensya na tabi duman sa dai naka-iba, magtimbre na lang.


An bagong Kantong Putikon yaon na sa SM City Naga, enot courtesy of Ms. Amy Garcia Villafuerte kan ABS CBN ngonyan sa Activity Center na.


An sabi kan iba an print media sa Naga naghihingalo na o magagadanon na, marhay ngani ta igwa pa nin mga judicial notices asin mga resolutiones hali sa mga Sanggunian tanganing maguin epektibo bilang ley o ordinansa kaya dapat ipublikar sa mga diyaryo.

* * *

Mga reaksyon asin dagdag na impormasyon sa mga naka-agui kong column hali ki Manny Gallardo alyas “Bagman”sarong taga media na miyembro man kan Kantong Putikon: “kan si Rick Diaz bako pang Atty. May programa siya sa RMN DZHN na an titulo “Ric after 9” sagkod sign off.


Palibhasa gadan na an 4 na Tagulipdan naisipan ni Ric na bako sanang puro music kaya namundag an Ric after 9 plus Tribol Patrol.


Nasa rooftop kami kan Naga City Public Market iribanan kami na Mar Juson, Danny Aureus, Vic Benosa, Manny Gallardo, Alex Loilo, Eugene Racadag, Mach 3, 1980 to be exact nagpoon armado nin Broadcast Media Council Accreditation na pirmado ni Doroy Valencia bilang chairman.


Alagad kan magsikat na an BBS DWLB bilang tinuwadan kami ni Ric Diaz nagbalyo sa radyo ni LRV nawalat kami ki Tony Betito asin ki Al Lanuza alyas “Bedroom Voice” asin Fiscal Jose Erestain.


“The rest is History.”