Karambola



Sarong programa sa radyo asin sa live streaming sa Facebook sa pagka-aga poon alas 9:00 na simulcast nationwide iyo an programang Karambola na nadadangog man sa lokal na estasyon digdi sa Naga.


Imbes kan tarabugaan, fake news asin propaganda sa primetime pagka-aga, magayon an programang ini ta pan-nasyonal an isyu asin hararom an tratamento kan mga hosts kan programa na si Atty. Trixie Cruz Angeles, si Mr. Conrad Banal asin si Mr. Jonathan dela Cruz.


Kun minsan may mga bisita na inaapodan sa luwas kan estasyon: taga-Manila, taga-Bisaya o taga-Mindanao o ibang pare kan Luzon tanganing magtabang sainda pagdiskutir kan isyus.


Bako lang mainit kundi relevante an pigtutukar ninda.


Minsan an mga halangkaw na opisyales kan gobyerno pigpipitik ninda, kun minsan pigsusurog man kun sa heling ninda may tama asin may diretso.


An pirmi nindang natatatsaran iyo an DOH lalo na si Sekretaryo Francisco Duque III partikularminte dapit sa kundukta kan pag-bakuna kontra Covid 19. Pinapatamaan man ninda an Food and Drug Administration asin an mga kasuguan kan IATF.


Pigbuyagyag ninda kan sarong aldaw na an mga lalaki na tinatamaan nin Covid na sufrir nin erectile dysfunction. Apektado daa an pig-aapod nindang “pototoy” na suboot minalomoy.


An paglikay sa Covid bako lang paglikay sa helang o kagadanan kundi pag-ibitar sa mahal na gastos sa pagpabulong kontra Covid. Comfirmado daa yan k an naguin pasyenteng lalaki.


Pigdidiskutir ninda an pagduda na may negosyo sa likod kan pagpabakal nin mga bulong sa Covid pati kan bakuna hali sa manlaen-laen na nasyones na naggigibo kaini na pang-kontra Covid 19 saka Estados Unidos pati Inglatiera.


Dai man ninda pig-uuntukan an Department of Agriculture orog na si Seckretaryo William Dar asin pag-iriba kun tano ta mas mahilig sindang mag-importar bako lang bagas kundi pati karneng orig asin mga de latang kakanon.


Pigsusurog kaya ninda an mga lokal na paratanom asin para-ataman nin hayop. Nagtutubod sinda na dakul an delhinsya sa importasyon nin mga produktong hali sa luwas kan nasyon para sa mga Pilipinong konsumidores.


Mayo man daa kayan kadto, ano ta ngonyan na lang. Herak man daa kan mga lokal na paratanom asin mga para-ataman nin orig, baka, manok asin iba pang hayop na pigkukuanan nin karne.


Pigtutuyaw man ninda an mismong liderato kan Camara de Representantes sa bilang pagbasura kan Impeachment case kontra ki Supreme Court Justice Marvick Leonel.


Tinutukar ko ini ta mayo lamang radio proraming na siring ngonyan na mga ngonyan digdi sa Naga, Iriga, Camarines Sur asin ibang parti kan Kabikolan.


Maski sarong semana saro kuta kun igwang mga lokal na broadcasters an matokar kan mga importanteng bagay digdi sa Bikol bako lang politika kundi pati negosyo, kultura, estorya, arte asin kun anu-ano pa.


Nagigiromduman ko kan dekada 70 kan kasagsagan kan Martial Law kan an mga estasyon nin radyo sa Naga magmukna nin seminal na programa simulcast sa gabos na estasyon kada Sabado sarong oras may banga na nadadangog sa DZGE, DZDR, DWNW asin DWRN kaidto.


An mga anchors sinda Sammy Garcia, Celso Baguio, Elmer Abad asin an saindong lingkod.


Bako lang naguin bantugan an programa sa enterong Kabikolan na pigdadangog kan kadaklan kundi nagbunga kan pagkaburunyog kan mga lokal na broadcasters, kan KBP asin an pagkamundag kan Association kan TV, Radio Announcers of Camarines Sur (ATRACS).


An titulo “Programang Pang-kauswagan’.


Sana magbalik an siring na programing maski digdi sa Bikol lang siring kan aga-agang ginigibo sa DWIZ Manila asin Home Radio digdi sa Naga asin sa Legazpi City.


An mga recomendado kong co-anchors o co-hosts sa programang iyan na dapat simulcasts sa gabos na estasyon, AM asin FM, sponsored kan KBP iyo sinda: Ervin Borja, Gil Basmayor, Paul Manaog, Benjie Rivera, Grace Inocentes, Elmer Caceres, Alex Parfan, Joel Jeremias, Raul Sodsod asin Benny Decena.