top of page

Karantahan sa Plaza Quezon



Sabadong Bangui, an Quezon Square ( Plaza Quezon) pinag gigibohan kan mga amateur singing contest arog kan Liberty Big Show, Darigold, Dalan sa Kalangitan, asin Hagyanan sa Kabituonan. Iyo ini an pinaka sentro nin kaogmahan sa Naga na pinag dudumanan kan mga tawo ta mayo pa kaidto nin telebisyon asin Youtube. An magtindog sa stage kan Plaza Quezon sarong pangitorogan na dai basta basta magibo nin siisay man afuera sana kun igua ika nin talent sa pagkanta. Sigun sa mga gurang, kaidtong mga taon 60-70 an mga nagsikat na parakanta iyo sinda Latumbo, Rosana, San Miguel, Concha, Serrano, Soriano, Santileces, etc. Saro sa naging kampeon kan panahon nin pistaym iyo an half brother kan sakuyang ama na si Frederico Alcantara Parma tubong Baras na may boses ni Perry Como asin naging parakanta sa mga Night Spots sa Avenida asin naging ekstra sa mga pelikula. An mga nagsunod na henerasyon nin mga parakanta sa Plaza iyo sinda: Saludes, Balani, Velasco, Cadores, Polilio, Saunar, Obrero, Papin, de los Santos, Buhay, Duran, Collantes, Reyes, Ervas, Nacario, Mimay, Tayam, Aberos, etc.


An mga panlaban na kansyon arog kan, Sa Langit ako Maghihintay, Free Again, Granada, If You go Away, I who have Nothing, Exodus, etc. Saro sa ganador na pig hangaan sa Plaza iyo an sarong bakla sa persona ni Rosendo ( Ross ) Delgado, ta mahilig sa rock and roll asin kantang kowboy, hawig ki Elvis Presley asin Frankie Laine. Nabisto man an magturugang na Munding asin Dario Concha tubong Kinale, magturugang na Danny, George asin Zeny Olivera kan Arana ( Si Zeny saro nang successful singer sa Brisbane Australia). Haloy na naging audition master si Gerry Latumbo asin Tony San Jose, asin an nag akompanyar iyo an Flamingo Combo. Sa kada pagtapos nin kanta, an contestant, pinapa pugol tolos nin abredong softdrink tanganing supsopon mantang naghahalat kan anuncio nin mga ganador.


An solamenteng makasuya sa Plaza, iyo an pagpasale kan mga hambogon na istambay asin mga barombado, na sa tahaw nin kaogmahan, nag gigibo nin kariribokan arog kan pag flying kick sa nakursunadahan na soltero asin an pag tsansing sa mga kababaihan. An mga paradalan, kuntento sa pagpapa ragamo nin salted na mani na nababakal sa maiitom asin matataba na paratienda kaidto sa Plaza Rizal. An karantahan sa Plaza, inot nang pina uso sa mga mayayaman na naciones arog kan America asin Britania. Si Matt Monro ( Born Terence Edward Parsons, 01 December 1930 – 07 February 1985) sarong Briton na nadiskubre an bulawan na boses kan siya nagbale sa amateur singing contest kan Radio Rediffusion’s Talent Time Show sa Hongkong kan panahon na siya nagseserbe sa British Army. Dai nadadaog si Matt Monro sa karantahan kaya an Radio Host na si Ray Cordeiro nagdeklara na bawal na siyang magbale sa karantahan tanganing matawan nin buelo an ibang contestants, asin tinawan si Matt Monro nin regular na programa sa radyo ( Wikipedia). An mga nagkanta sa Plaza Quezon na pig suerte na mabisto sa Pilipinas iyo sinda Imelda Papin (Partido), Nora Aunor (Iriga), Neddie Decena (Dimasalang), Rhodora Silva (Sipocot), Romeo Miranda (Sangay), asin Bert Malaga. Sigun sa estorya ni Radio Announcer Fiorel Salvo, siya an host sa finals kan Darigold na an naglaban sa Regional finals iyo sinda Nora Aunor asin Neddie Decena ( tugang kan Announcer na si Benny Decena ) nagtabla an duwang parakanta kun kaya pig pa desisyon si Fiorel Salvo kun siisay an saiyang papaboran. Sa pagtubod na mas deficil an laban sa Manila na iyo an national finals, mas makakanigo siguro na maputi an ipapadara arog ni Neddie Decena. Duman nagtubod si Fiorel Salvo na nagka igua saiya nin hinanakit si Nora Aunor. Si Romeo Miranda ) ( nagpa sikat kan kantang Love me now and Forever asin Leading man ni Vilma Santos sa pelikulang Dyesebel) nag erok sa Abella asin Naga City Subdivision, naging regular man na parakanta sa Plaza Quezon, asin naging sikat na parakanta kan panahon ninda Victor Wood asin Eddie Peregrina.


Si Romeo Miranda naka base na ngonian sa California asin may duwang aki na Nurses. Saro sa pinag hangaan na kampeon sa Plaza Quezon iyo si Corazon Ros na tubong Liboton, ini may magayon na boses, mestiza, magayon na lalawgon, gulping kalalakihan an naghanga sa gayon ni Cora ta garo ining Anghel na may magayon na huyom asin may pambihirang boses na pinag halong Shirley Bassey asin Petula Clark, dai nanggad nadadaog sagkod na nabisto sa pagkanta sa Manila. Naisaplaka ni Cora Ros an mga sonatang Magayon asin Understand sa irarom kan Bicol Express Records. Alagad mas pinili ni Cora Ros an mag estar sa Las Vegas Nevada USA. Ibang iba an kaorogmahan sa Plaza Quezon ta sa karantahan igua nin komedya, ini sa paagi ninda Nap Estipona ( Palestina), Didoy Estacato ( naging Announcer sa Legazpi) , asin si Susing Opiana (Magarao). Sindang 3 iyo an nagtataong dagdag na kangingisihan antes na eanunciar an mga ganador. Saro sa dai malingawan na comedy skit ninda iyo an pag arog arog kan buhay ni Hiroo Onoda, an struggler na hapones na nagtago sa Lubang Island maski tapos na an WW2.


An pangirit ninda kumpleto nin costume na arog kan sarong pelikula, asin an naging tampok kan komedya , iyo na an tungkol sa aro aldao na pagkakan ni Onoda sa bukid. Langka an pagkakan ni Onoda, asin minsan na nag LBM ini sa langka, napiritan siyang magribay nin pagkakan sa paagi nin Ogob. An nagsunod na henerasyon ki Nap, Didoy asin Susing, iyo sinda Andoy Pakoykoy asin Pamela (Ben Olleta). Sa ordinaryong aldao, si Andoy Pakoykoy iyo an nagmamanehar sa distribusyon kan local na dyaryo na Bicol Banner na an harong yaon sa likod kan Bello Building sa kalye P. Burgos. Sinda an mga tawong nagtao nin kaogmahan sa mga bikolano na kaipuhan nanggad na romdomon asin dai lingawan. Dai namamati an pag tios nin buhay kaidto, ta sa aro aldao na pagtrabaho asin kapagalan, nakukua pang mag huyom asin mag ngirit ta yaon an Plaza Quezon, an centro nin kaogmahan sa Naga City.

Comments


bottom of page