Karawat sa Barangay



Nasisibot na naman an mga kasolterohan, mga kalalakihan ta nagbabalik na naman an mga inter-zone basketball tournament makalihis an duwang taon na bawal an mga karawat huli sa Covid 19. Ngonyan nagiging uso an mga kawat nin mga soltero asin mga gurang na makukusog pa an mga tuhod ta ralapagan, aragawan, turuklangan sa kawat na basketball an kaipuhan, siempre an mga gurang na senior citizens dai na puede ta kuntento na an iba sainda sa pagkayab kaya basin pag basa nin komiks sa balkon. Sarong Barangay sa Calabanga an may makonsuelong istorya sa Inter -Zone Basketball Tournament, na kaya pirmeng nag kakampeon ta nag uusar nin bawal na armas, kun sa giera, bawal an armas nuclear o chemical warfare. An istorya sa Calabanga, iyo na, an sarong team nag uusar nin sa osmak na sistema, na dapat ipagbawal kutana ta ini nakakaraot nin salud nin ibang tawo, an maindatang Sistema, iyo an inaapod na Kili Kili Power. An team na may kili kili power pirmeng gana maski bako man matitibay an mga parakawat ta sinda nag arkila nin sarong kargador na maskulado, alagad simanal kung magkarigos kaya igua siya nin mabagsik, asin malanit na sangaw kan saiyang yokyok, kaya inaapod ini na Kili Kili Power. An basketball player na iguang ikim ikim na Kili kili power mas bisto sa alyas na Boy Kanding. Si Boy Kanding, antes maglaog sa kawat, ini pig susugo kan saiyang coach na mag sabsab muna nin gulping sibuyas, dahon nin tanglad, sinabawan nin dahon nin kantutan, tanganing ang alisngaw kan saiyang lawas mayong pinag iba sa nakakalasun na kemikal arog kan pig uusar sa Chemical warfare. An siisay man na parakawat na masangawan kan saiyang yok yok, tolos nagdidiklom an paghiling, nag aagrangay, nawawaran nin animo na huna mo pirmeng pig aatake nin almario kaya tolos pinapa singhot nin white flower. An ibang player na matipsikan kan ganut ni Boy Kanding tolos nagkaka igua nin magatulon na bu’ni, asin dai naghahaloy igua naman siyang parong kanding. Dara kan makatakot na kili kili power ni Boy Kanding, pig dudurulagan siya sa rebound, naglilikay sa saiyang pag lay up, asin pag dribble nin bola, kaya pirmeng gana an team ni Boy Kanding. Haloy na panahon na nag rehinar sa Barangay an team ni Boy Kanding, sagkod na nag abot an panahon na dai na nakakawat nin basketball si Boy Kanding ta ini naghelang dahil sa resulta nin kabaglaan sa lawas. Basado sa mga tugon kan departamento sa salud, iyo an pagiging malinis sa lawas an sarong tawo. Ta an tawong may malinig sa lawas, igua nin marhay na salud asin pag iisip. Sa mga classroom kaidto sa elementarya, nakasurat sa itaas kan blackboard, an kasabihan na, Cleanliness is next to Godliness.