Karma is Coming!

Tigsik ko an urag-uragon na gurang

Sa dakulang tiripon pig-imbitaran

Ginisa kan babayeng matarom an kaisipan

Nagtarakig, nakairihi sa sarawal!

Tigsik ko man si Kikay Istariray

An uugalion, sa brusko, garapal

An feeling sa saiya an kinaban

Nagginitil, nakaurula an sabaw!

Tigsik ko an singkit na polpolitico

Sa buhay mayong ibang urgolyo

An pagigin atsoy kan saiyang amo

Nagkupsit, sa nerbyos, atakado!

Tigsik ko an polpol na kalbo

Nakatugdon sa masiram na puwesto

Ginibong kiko-kiko kan saiyang amo

Kan linaglag, ginanot pati an payo!

Tigsik ko an makanos na santol

Sa garantol na langtad pigtanom

Kan nagbunga abaa nang alsom

Mga tawo nagraragot an ngipon!

Tigsik ko an magin urag-uragon sa mundo

Dae minadanay, ini minapondo

Dae pakasobra, dae pakaseguro

An karma mabalik, isusunganga sa pandok mo!