Kasag Pa More



An ika duwang simana kan Setyembre masibot, maogma asin sagana sa karakanan ta iyo ini an simana antes kan kafiestahan ni Ina. Ngonian na taon, saro sa pinaka mayor na kasiribotan asin kaogmahan kan mga Bikolano lalo na sa Metro Naga iyo an Traslacion Procession sa Viernes, Setyembre 9, 2022. Pero dai man nalilingawan kan mga bikolano an saro pang dakulaon na fiesta sa mayaman na banwaan kan Calabanga para ki Nuestra Senora de La Porteria. Yaon pa sana ako kaidto sa elementarya kan darahon ako ni Mama Pulen sa simbahan kan Calabanga tanganing mag tienda nin kandila ta iyo ini an simbahan sunod sa Cathedral na matrhay an bentahan nin kandila. An palibot kan simbahan iyo an mga doot ta mayo pa nin mga harong asin tiendahan, bakong arog ngonian an simbahan yaon na sa tanga nin Negosyo asin Merkado kan banwaan nin Calabanga. Katabang ko sa pag tienda iyo si Tiya Maria, saro siya sa mga tugang kan sakuyang Ama na arog man kan mga tugang na sinda Veron, asin Pisya an ultimong nahiling kan familya kan taon 70 ta an mga ini nag istar sa kamanilaan. Susog sa parating istorya kan mga pobreng bikolano na naglalarga pasiring sa Manila asin sa maaraman na rason an dai na naka balik sa Bicol sagkod na dai na naisihan an saindang kamugtakan, puedeng buhay pa o mayo na ta sa panahon ngonian sinda nag iidad na nin 70 sagkod 75. An Kafiestahan kan La Porteria sa Calabanga, saro sa mga paborito kong pasyaran ta digdi ko na experiencia an naiibang handa o pagkakan na masiramon, ini an pagkakan nin sarong planggana nin darakula asin matataba na kasag. Naki pamiesta kami sa harong ni Kuya Jimmy del Puerto, agom ni Ate Cena Malaluan del Puerto na iguang residencia sa San Roque, Calabanga. Tamang-tama, mapagal an biyahe sa Calabanga ta kadakol nin mga naki pamiyesta, pag abot mi sa centro, tolos kaming nag sakay sa gurangan nang fuji Tricycle tanganing ihatod kami sa Iraya Tacolod sa balyo nin halipot na tulay. An harong kaidto ni Kuya Jimmy sarong simpleng sementado asin tabla pero malinig asin may mga tanom nin lukban asin frutas an palibot. Kadakol nin masisiram na handa, pero an naka attract samuya ( kaiba ko si Gil de la Cruz asin saro pang amigo) iyo an dakulang planggana na pano-pano nin linabunan na kasag na tienda sa kataid na Barangay kan Sabang. Masiramon magkakan nin mataba, lamo-lamo sa aligi na kasag na iyo sana an partner sa maloto. Perang taon na naging ugali ni Kuya Jimmy na iluwag samuya an darakulang kasag sagkod na mag abot sa punto na nagluya an gusi nin kasag sa San Miguel Bay kaya deficil na maghanda nin planggana nin kasag. Dara man nin pag-edad, si Kuya Jimmy del Puerto ( tubong Bagumbayan Sur) maluya na asin naghihiro sa paagi nin wheel chair. Saro siyang retiradong US Navy na saro daa sa naging trabaho niya iyo an mag preparar kan lamesa nin pagkakan kan interong Navy nin dakulang barko. Saiyang napa ngagom si Ate Cena Malaluan magayon na daraga na tubong Capalonga, Camarines Norte. Minsan naisipan ming mag fiesta sainda antes kan Pandemya, yaon man giraray an masisiran na handa sa lamesa pero nawawara na an Kasag. Mayo na an maogmahon pagmasdan na nakaka tilam tilam na sarong planggana nin matatabang kasag ta sigun sa mga paratienda tios na sa kasag an kadagatan kan San Miguel Bay.