top of page

Kasugoan kan ERC sa ‘Refund’ dapat itao na kan Casureco II

Itutulod kan sarong miembro sa Sangguniang Panlungsod kan Ciudad nin Naga an sarong resolusyon na naghuhurot sa Energy Regulatory Commission (ERC) na iimplementar na kan Camarines Sur II Electric Cooperative (Casureco II) Inc. an ‘‘Refund’’ kan ribo-ribong miembros consumedores kan cooperativa base sa desisyon kan ahencia petsado Abril 17, 2023.


Si Consejal Vidal Castillo sa entrevista kan Bicol Mail nagpahayag na sa masunod na sesyon regular mapadreno siyang resolusyon nganing sugoon na kan ERC an Casureco II na ibuelta na an over charging sa tarifa sa kuryente sa miembros-consumedores na haloy nang isyu laban sa cooperativa sa tahaw kan padagos na paglangkaw sa tarifa na nag-aabot na sa P10.75/kWh asin posibleng igua pang sunod sa bulan nin Hunyo 2024.


Sa entrevista kan BM sa official spokesperson kan cooperativa, Rinner Bucay sinabi kaini na nagsimbag na an manijamiento sa desisyon kan ERC alagad hinahalat ninda an ‘‘reply’’ kun pera an dapat ma-refund sagcod ngunian dai pa ninda narerecibe.


Kan Marso 2024, si tarifa sa residential – P5.21; sa low voltage – P4.33; asin sa high voltage – P3.16 alagad kan Mayo 2024 sa residential – nagdoble nagsakat sa P10.75; sa low voltage – P9.88 asin P9.04 sa high voltage. An paliwanag kan Casureco II an paglangkaw kan tarifa sa tahaw kan naglalangkaw man an presyo kan kuryente na saindang binabakal sa power suppliers.


Piglinaw pa ni Bucay na bako lang sa Casureco II naglangkaw an tarifa envez haros gabos na mga cooperativa nin electricidad sa Bicol maging sa iba pang lugar.


Sinbabi kan consejal sa desisyon kan ERC na pirmado ni Chairman Mona Dimalanta saro sa mga findings, padagos na nagbabakal kuryente an Casureco II sa Masinloc Power Corp. Limited (MPPL) sa presyong halangkawon kumpara sa average sa Luzon dawa nagpaso na si Contract for the Supply of Electrical Energy. Ini huli ta mandato na dapat nag-agi sa sarong Competitive Selection Process antes nagkua nin power supply, na dai nagsunod sa urolay.


Kabale sa desisyon kan ERC sinusogo an Casureco II na i-refund ninda si gabos na nakoleta na generation rate in excess sa load weighted average NPC TOU rate sa Luzon poon kan Mayo 26, 2015 hasta sa ultimong billing antes binaba an desisyon kan ahencia.


Magigirumdum kan Marso 2023 segun sa consejal si dating VP Leni Robredo iyo si nag-inisyar na imbitaran si ERC Chairman Dimalanta sa sarong dialogue kan manlaen-laen na sektor kabale an opisyales kan City Hall asin manijamiento kan Casureco II nganing ipaliwanag asin hanapan nin solusyon an halangkawon na tarifa kan cooperativa.


Naging produktibo si urolay mantang pigdangod si reclamo sa halangkaw na tarifa sagcod pinaliwanag kan ERC si datus asin nagpaluwas nin desisyon kan Abril 17, 2023 paborable sa miembros-consumedores kan cooperativa nin electricidad.


Nagtutubod an consejal oras na marealisar an ‘Refund’ makatabang nganing magbawas an saindang binabayadan sa electric bill bulan-bulan sa tahaw kan pagparalangkaw na kan mayor na produkto sa mercado.

Comments


bottom of page