Katekismo Katolikong Pagboto

By Caceres Education Cluster

Pàno an katoliko magsunod kan mga tugon?

Sa pagsunod kan mga Tugon, kaipuhan an Katoliko may Katolikong Puso, Katolikong Kalag, Katolikong Isip asin Katolikong Kusog.

Bilang simbag sa hapot: ‘Maestro, arin an pinakaurog na tugon sa Batas?’ apat na mga simbolo an ginamit sa mga ebanghelyo: puso, kalag, isip asin kusog.

Ki Mateo, sarong Pariseo an naghapot na sinimbag ni Jesus:‘Kamutan nindo an Kagurangnan nindong Dyos sa bilog nindong puso, bilog nindong kalag, asin bilog nindong isip. (Mt. 22:37)

Ki Marko, sarong eskriba an naghapot, asin ini an simbag ni Jesus: ‘Ini an enot: Hinanyuga nindo Israel, an Kagurangnan tang Dyos iyo an sasarong Kagurangnan, asin dapat nindong kamutan an Kagurangnan nindong Dyos sa bilog nindong puso, bilog nindong kalag, bilog nindong isip asin bilog nindong kusog. (Mk 12:29-30)

Ki Lukas, sarong abugado an naghapot. Si Jesus nagsimbag: ‘Kamutan nindo an saindong Dyos sa bilog nindong puso, bilog nindong kalag, bilog nindong isip, asin bilog nindong kusog.’ (Lk 10:27)

An mga simbolong ini nangangapudan satong mga Katoliko na an satong mga puso, kalag, isip asin kusog dapat nanggad na sa Katoliko.

Ano an katolikong puso?

An Katolikong Puso sarong puso na hinurma sa Mahal na Puso ni Jesus. (CL, 33)

An Katolikong puso nakakakuang kahulugan sa sakripisyo. Para sa Katoliko, an pagsakit sarong balaog, sarong pagkakataon na magtalubo sa pagtubod, paglaom asin pagkamuot. Dawa sa tahaw nin kasakitan, dapat kitang magdarang kaugmahan sa satong kapwa.

Kaya lang, kadaklan kan satong mga puso mga madrama imbes na Katoliko. Bantog sato an mga telenovela – buot tang magdanay sa kamunduan. Buot tang mag-erok sa pagdusa sa salang paghuna na an kaligtasan yaon sa kadramahan. An Katolikong Puso dai nag-iisip sana kan sadiri; dai sya nagdadanay sa drama tangani sanang kaherakan kan iba.

Imbes, an Katolikong Puso nagdadanay sa pagtios tanganing mapagian an buhay kan iba. Nakakasabot na an satong misyoniyo na kita magin mga disipulo ni Kristo, andam kitang magsapo nin kasakitan asin persekusyon. An Katolikong Puso, sa pagsunod sa Mahal na Puso ni Jesus, nagdadanay dawa sa tahaw nin pagsakit.