KBP Accreditation

Haradit an mga broadcasters ngonyan ta karampanyahan na asin madali na an eleksyon pero an iba mayo pa nin KBP acreditation.

Sa lindong kan pagboot kan Kapisanan ng mga Brodkaster ng Pilipinas dai pwede an maski siisay sana magtaram sa aire lalo na sa radyo bilang anchorman, komentarista o maski field reporter na dai nakapasar sa accreditation exam na itinatao kan KBP.

Haro-halawig nang panahon na an representante kan KBP haling Manila dai nagdidigdi sa Naga tanganing magtao nin test.

An ibang accredited members dai man nakaka-renew o nakakapabago kan saindang accreditation sagkod ngonyan.

An mga taga- Camarines Norte na nagkukua nin exam sa Naga sige na an harapot kun pano mare-renew an saindang membership ta dai na kayang magpa-Manila pa.

An paso na an accreditation pakalihis nin tolong taon dai na togot na magbroadcast on the air.

An lihitimomg miyembro kan KBP ta valido an saiyang paguiguin miyembro o KBP accredited broadcaster, kun iparayo nin Diyos bawian nin buhay maresibe nin 100 mil pesos para sa pamilyang nawalat ta naka-siguro an saiyang buhay. Alagad kun nagadan siyang paso na an saiyang accreditation mayo siyang mareresibe maski sarong sentimo.

An pangapudan ngonyan sa KBP sa lokal asin nasyonal: ano na an nangyayari?

Garo mayo na nin disiplina an mga nagtatararam sa radyo asin telebisyon, an mga bareta puro translation kan mga hali sa Manila asin abroad na English o Tagalog kaya pati an Bikol sarala.

Bakong arog kadto kan mga panahon na burunyog an KBP asin mga broadcasters sa Bikol ngonyan nagdudurulak na an iba pero mayo man nagsasaway o nag-didisiplina sainda.

Igwa ngani nin politiko na bako man broadcaster asin dai man accredited kan KBP an sige an taram permanente na pati, may mga alipores lang na nagto-toss kan volleyball bago mag-kill.

Inabandonar an Community Advisory Board o CAB na iyo na lang an natatada sa enterong Pilipinas digdi sa Camarines Sur pero reconicido an chairman ta iyo an dulukan kun may mga mahalagang pangangaipo.

An sectoral representation na compuesto nin mga representantes kan mga abogado, kan mga doctor, mga padi asin iba pang sektor pinabayaan.

An problema ngonyan kan mga broadcasters ta mayo nang ibang kinatatakutan kundi an saindang among na nagpapa-sweldo sainda pero mayo na nin self regulating body arog kan KBP na mamato-mato kan saindang aro-aldaw na aktibidades on air asin off air.

Mahal man pati an bayad sa accreditation exam na nag-aabot 600 pesos pero maski ka maka-pasar kun mayo saimong magkua nin estasyon, jobless ka man guiraray. Pwedeng volunteer o community pantry sa radyo asin telebisyon an saimong aaboton.

Sa renewal inaabot 900 pesos para sa tolong taon, an problema ta an iba dai nakaka-renew ta dai man nagdidigdi an taga-Manila na representante kan KBP. Pano kun may imherhensiyang mangyari sa saindang buhay?

Igwa man kutang gustong buhayon liwat an ATRACS o Association of TV and Radio Announcers of Camarines Sur pero dakol an nagkokontra lalo na an politiko kun dai ninda mailalaog sa saderi nindang bulsa.

Igwa man nagpapabor basta magamit ninda personalmente an organisasyon. An mga orihinal na miyembros kan ATRACS pabor man kuta tanganing maibalik an unidad asin pagkakasararo sa industriya, maguin propesyonal an mga broaadcasters asin malangkawan man an saindang mga sweldo.

Ini an panahon na an KBP na maghiro para sa kapakanan ka mga working broadcasters bako para sa mga managers asin may saderi kan estasyon asin networks.

Panahon man na an mismong para-antabay, paradangog o paradalan---live streaming na pati sa FB asin ibang social media platforms ngonyan nadadalan sa enterong kinaban pati kan mga OFWs na magkasararo man sinda sa pag-omaw kan mga broadcasters sa marhay na calidad kan saindang mga programa alagad dapat magtuyaw asin mag-prangka kan saindang pag-tatsar kan mga sala kun kinaka-ipuhanan.