KC pinakakan nin masustansya an mga aki kan pobreng familia

NUTRI-FEEDING. Ginibo kan Kiwanis Club of Metro Naga sa mga biktima kan bagyong Rolly asin Ulysses sa barangay Sabang asin Triangulo, Ciudad nin Naga.

Mantang an mga kaakian saro sa sektor na apektado kan calamidad bako lang kan pandemya maging kan tolong mga nagrapadong bagyong Quinta, Rolly asin Ulysses an Kiwanis Club (KC) of Metro Naga sunod-sunod an saindang relief operations alagad naging envuelto naman sa pagpakakanda nin mga masustansya sa 500 na kaakian sa duwang barangay kan Ciudad nin Naga.

An KC Metro Naga na pinamamayohan kan saindang Presidente Norita Martinez Bagong nagpahayag na ini ngunian an saindang misyon nganing ipadagos an pagtabang asin pagtao nin tabang asin mga ayuda sa apektado kan mga calamidad sa Camarines Sur.

An mga menor de edad dai napapauntok sa ngonian nin huli sa pandemya lalo na sa saindang pagklase na naperwiso kan halawig na brownout huli kan pagrapado kan makukusog na bagyo apektado an saindang pag-escuela sa blended learning.

An mga pobreng familia iyo an pinakakan nin mga masustansya kan KC Metro Naga sa barangay Sabang na igwang 350 asin 150 sa barangay Triangulo, an barangay na ini parejong inabot kan hararum na tubig baha.

Kan huring semana kan Noviembre an grupo kan Kiwanis Club nagbisita sa tolong mga barangay kan San Fernando, Camarines Sur nganing magdistribuer nin mga nipa, pako asin coco-lumber sa mga familia na pinalakma an saindang harong kan nakaaging mga calamidad.

Dai palang nahahaloy an KC nagtaong mga relief goods sa mga biktima kan bagyo sa Buhi asin Nabua kan Rinconada area, ika-limang congressional district kan Camarines Sur.

Si Bise Alcalde Allan Valenzuela kan LGU San Fernando nagpahayag na dakulang bagay an mga nagtataong tabang sa saindang mga barangay mantang haros naarahit na kan Covid-19 asin mga bagyo an saindang calamity fund.