Kiisay kita?! Kiisay ako!?

Ini an totoo, kan 2016 para presidente kan Pilipinas ki Digong ako, kan enot dai ko pa segurado an vice ko ta dai ko aram kun talagang desidido si Cong. Leni na pinirit lang siya ni Pinoy asin ni Mar Roxas na magkandidatong Vice-Presidente ta habo si Grace Poe ta an gusto man kaya ni Grace magkandidatong pagka-presidente.

Ako si Digong an kursunada ko ta inalok ako ni Dante Jiminez na mag-iba ki Duterte ta an kampanya niya para sa Federalismo asin Bicol Autonomy.

Ako man an gusto ko magbago nin sistema ta malaen nang marhay an politika asin ekonomiya kan Pilipinas. Dati akong aktibista, hali ako sa media asin naimbuelto sa lokal na politika pero an paghuna ko kaidto an mga politiko magpoon sa mga Aquino, Ramos, Estrada, Arroyo asin iba pa gabos lang pansaderi asin napapabayaan an kasaraditan na mga Pilipino.

Kan si Digong mag-anunciar na siya makandidato para presidente nagduduwa-duwa pa ngani pero siya an kursunada ko ta enot akong nakumbinsir kan sakuyang kaklase sa high school na naka-estar na sa Davao City na si Digong saka an saiyang aki na si Sara mga marhay na alkalde asin alkaldesa kan pinaka-dakulang ciudad (sa kadagaan) sa kinaban.

Napalayas an mga NPA asin mga kriminal saka pasaway sa dakulaon na ciudad, nagka-igwa nin disiplina sa lokal na gobyerno, sa pulisya asin militar asin iba pang funcionarios sa pangengenot ni Digong asin ni Sara sa laog nin sobrang duwang dekada.

Bako lang naglilibot si Digong sa kahiwasan kan Davao na naglulunad sa saiyang big bike o dakulang motorsiklo kundi dai aram kan kadaklan na nagkakayod siya nin taksi kun bangui tanganing magtabang pagmantenir kan paz y orden, mabantayan an mga parahabon, mga barumbado, mga tarantado, mga holdaper na dai maka-operar sa laog kan teritoryo kan ciudad ta an Mayor iyo mismo an nagbabantay.

Nagpoon kami na Dante Jimenez dai ngani na sampolo katao kaibanan si Elmer Abad ta mayo man nagtutubod na magana si Duterte.

Huri na kan mag-abot si Judge Marvel Clavecilla na taga-Capitolyo nangako na kun dai madagos si Grace Poe o madisqualificar na ini ta bako daang tunay na Pilipino ma-suporta siya asin si Cong LRay ki Digong na kun madagos ta ini saiyang kaklase sa abogasiya sa San Beda, ka-brod sa Law Fraternity asin kumpadre pa. (Ngonyan siya na an Usec for Bicol Affairs).

Sa parte ko bilang suportador kan kandidatong dai ko man bisto tolos nagprograma akong 15 minutos kada alas 7:00 nin aga aro-aldaw sa Farm Radio bilang pagpabisto ki Duterte como marhay na Mayor kan Davao City asin pwedeng marhay marhay na Presidente kan Pilipinas.

Pro bono. Libre o mayong bayad. Minasakat ako nin apat na eskalon aro-aldaw sa edificio ni Abucar tanganing tukaron an mga isyu, plano asin plata porma kan kandidatong dai ko pa personal na naheheling.

Anom na bulan nag-programa ako sa rdyo libre para ki Duterte. Kan siya nagduwaduwa na magkandidato para presidente an saiyang aki na si Sara nagpatakot na siya asin pag-iriba na mapakalbo kan saindang mga buhok kun siya dai magdagos. An paghuna ko tapos na an kandidatura kan taga-Mindanao maski si Jimenez hadit na kadto na dai madagos si Mayor Digong.

Kundi si Abogadong Sal Panelo an sakuyang amigo intimo poon kan ako high school pa nagpa-interview sakuya sa GNN-TV48 asin nagsabi na bilang abogado ni Digong aram niya na madagos ini sa pagkandidato para presidente.

Pinaheling niya sako an sarong dyaryo semanal (weekly) na may pangaran Opinion na an editor si Panelo mismo. An mga bareta asin opinion dapit sa kandidatura ni Duterte kun todo may mga retrato pa. Sige na si miriting me na kan mag-aparecir na si Jugdge Clavecilla sugo kan saiyang padihon na talagang madalagan siya para presidente.

Alagad kan nagfile na kan certificates of candidacy (COCs) an ibang kandidato para presidente na mayo si Digong ta habo daa talaga. Katapos-taposi nagdagos man guiraray.

Kan magdalaw si Digong sa Naga asin Camarines Sur nagdagos sa Avenue Square ako an pig-olayan ni Sal Panelo na magdisponer nin paragastos para magpakakan sa kandidato, pag-iriba asin mga bisita, an sabi ko mayo ako nin kuarta na ipapakakan diyan.

Sabi ko si Fred Perdon na manager kan GNN48 iyo an saiyang kaolayon ta ini taga-San Beda man asin makuarta. Nadagos an pagbisita ni Digong sa primerong pagkakataon. An mga nagsabat pinangenotan ni Louie Ortega na nagpaguibo nin kadakul na T-shirts na may tatak na “Run Duterte Run”.

Ipig-introducir ako ni Panelo ki Duterte na ako daa an nagpapalakop kan mga bareta sa radyo asin peryodiko tungkol sa kandidatura niya alagad paka abrasa ming duwa tolos-tolos nagtaway ako asin nagrayo saiya.

Kan ilansar an librong “Federalism and Development” ni Ompong Baldemor duman sa Manila pagpa-retrato mi dai ako nagdukot ki Digong ta an sabi ko ngani sa mga miting me na Dante Jimenez asin Judge Clevecilla na dai man ako matrabaho sa gobyerno maski pa manggana si Duterte pagka Presidente ta enot gusto kong probaran na magtabang sa politiko na dai mahagad pabor.

Kadaklan kaya kan mga Pilipino matabang sana sa kampanya may karibay na empleyo, kuarta o halangkaw na pwesto.

Sabi ko man iyan an dapat ontokon tanganing magka-igwa nin pagbabago.

Mayo talaga kaming kuarta. Kairiba ko kaidto apuera ki Elmer Abad iyo si Alex Parfan, Jenis Nidea, Efren Ramos, Sammy Garcia asin nagkakapira pang taga-media pero enjoy kami ta bago an samuyang politika, bago an samuyang kandidato asin kun manggana man bago an hitsura kan bagong presidente. Primerong taga-Mindanao.

Si Cayetano na an napiling Vice-Presidente ni Digong. Hapot kan agom ko na buhay pa kadto, saro man na kolehiyala, siisay ngaya an vice-presidente mo? Sabi niya, maboto ako ki Duterte basta an Vice mo si Leni bako lang Bikolana kundi aijada mo sa kasal. Bilang Mayor kinasal mo baga si Jesse asin si Leni sa Milaor. Ika an nakapirma sa marriage certificate ninda.

Ika pa an nagtubong sa bunyag ki Aika, an saiyang matuang aki sabi kaidto ni Baby.

Iyan an kasunduan ming mag-agom: Duterte-Leni para sa pagkakasararo kan samong pamilya asin pagkasararo kan nasyon.

Nagtapos an eleksyon kan 2016, gana si Duterte gana si Leni. Paka-eleksyon tolos nag-apod sakuya si Sal Panelo nagpa-interview sa TV program ko ta siya na daa an spokeman kan Malacaṅang.

Sa induction kan KBP Cam Sur kaidto inimbitaran ko bilang KBP Community Advisory Board tolos si Sal Panelo na maguin guest speaker sa Induction kan bagong presidente kan KBP Cam Sur na si Romar Vasquez sa Villa Caceres Hotel.

Kan Oktubre kan 2016 iniba ako ni Dante Jimenez sa Malacaṅang pero dai ako nagdulok sa Presidente poon kadto sagkod ngonyan.

The rest is history.

Sa relasyon ko ki VP Leni asin sa pamilya Marcos: naka-inoman ko si Bongbong kaiba si Celso Baguio asin Bert Delos Martirez sa Villa Caceres kan dekada 90, naka-ulay ko si Bongbong saka si Governor Fariṅas sa Ilocos Norte kan 2011, durante kan birthday kan saiyang depuntong ama, naka-olay ko si Senator Imee, an nguhod na tugang na si Irene asin si Ex-First Lady Imelda Marcos sa birthday party ni Senadora Imee (kaibanan ko si Bokal Angel Naval asin Warren Seṅar).

Nagbisita kami sa harong kan mga Marcos sa Batac, Sarrat asin sa Laoag bilang pagngayo-ngayo ki Bongbong na iyo an chairman kan senate committee on lokal governments na dai tugotan na mabanga an provincia nin Camarines Sur.

Gabos sinda marhay na kaulay, maboboot asin dai tataong magmenos sa ordinaryong tao.

An pipilion ta sa maabot na eleksyon presidente kan Pilipinas bakong presidente kan Bikol.

An duwang hapot uya: Kiisay kita? Kiisay ako?

Siyempre, ki LENI ako (sana dai siya magbago kun siya presidente na asin dai magpadikta sa ibang tao asin ibang gobyerno tanganing mamantenir an tunay na Katalingkasan asin soberiniya kan nasyon Pilipinas).

Leni mabuhay ka!