top of page

Kilos-protesta ilalansar sa Bicol sa anibersaryo kan Martial Law

Ngunian na aldaw, Septiember 21, 2023 iyo an ika-51 anibersaryo kan pagpirma sa proklamasyon na nagdedeclarang martial law sa enterong Filipinas, magkakaigwa nin kilos-protesta an mga progresibong grupo sa ciudades kan Naga, Legazpi asin iba pang provincia kan Kabikolan nganing kundenaron an pang-aabuso sa deretso humano asin kurapsyon sa gobierno.


Si Vince Casilihan lider kan Bagong Alyangsang Makabayan (BAYAN) nagpaghayag digdi sa Camarines Sur gigibohon sa Plaza Oragon sa Ciudad nin Naga na paparticiparan kan multisectoral group hali sa limang congressional district kan provincia.


Maging sa Albay asin iba pang provincia kan Kabikolan sarabay man kan saindang kilos-protesta nganing ikundenar an martial law lalo na an ‘‘mga kalupitan ng rehimeng Marcos.’’


Saro sa isyu kan grupo iyo an kahurutan sa gobierno na ‘‘dapat tunawon na an NTF-ELCAC’’ nganing an fondo digdi gamiton envez itabang sa sektor nin agricultura.


Pigdedenuncia ninda an padagos na ginigibong ‘‘misinformation and historical revisionism of Martial Law’’ na cuestionable sa mga paratukdo kan Departamento de Edukasyon na planong bagohon an historicong nangyari sa 20 anyos na martial law sa panahon nin dipuntong diktador Marcos.


Kabali sa saindang ikukurahaw an kahurotan sa tunay na reforma agraryo, dugang na sueldo sa labor sector, ipasunod an pangakong viente pesos na presyo kan bagas sa mercado, paghali kan buwis sa produkyo nin petrolyo na padagos an paglangkaw kan presyo cada semana.


Mientras tanto, an PNP Bicol nagpaluwas nin direktiva sa mga provincial director na magwarak nin kapupulisan sa lugar kan kilos-protesta nganing maseguro an paz y orden.

(BAYAN - Bagong Alyansang Makabayan) FB page

Comments


bottom of page