Komunidad hagad an kooperasyon vs dengue

Kaipuhan an kooperasyon kan mga residentes kan barangay dai mag asa sana sa opisyales de barangay o Barangay Health Workers (BHW) sa pagtarabangan contra sa naglalangkaw na caso kan dengue.

Si Consejal Sonny Rañola, pamayo kan Committee on Health sa Sangguniang Panlungsod kan Ciudad nin Naga asin presiding officer kan Naga City Barangay Health Board nagpahayag na saindang inapodan na nin atensyon an BHWs na magtarabangan sa paglaban contra dengue sa paagi kan saindang advocacia.

Sinabi ni Rañola na naglalangkaw na an caso kaini mala ngani kadakle sa mga barangay kan ciudad igwa nang caso asin maabot na sa sangatos an tinamaan kan dengue na kadakle mga kaakian sa barangay.

Nganing malabanan an paglakop kan caso sa 27 barangay kan ciudad kinakaipuhan an kalinigan sa kapalibotan, maging an mga escuelahan piglalaoman an suporta sa kampanya sa kalinigan, sabi pa ni Rañola.

An kampanya para malikayan sa helang orog na sa mga kaakian dapat gibuhon an 4S laban sa dengue: 1. Search and Destroy, 2. Seek Early Consultation, 3. Self Protection Measures saka 4. Support Fogging and Spraying.

Sa datus kan Department of Health sa Bicol poon kan Hunyo 1 hasta Hunyo 18, 2022, naikurit kan ahencia an 607 casong dengue sa rehiyon asin an may halangkaw na caso iyo an Camarines Sur na igwa nang 364.

Sa Camarines Sur, antes naghelig sa Capitolio Provincial si Gobernador Migz Villafuerte nagpaluwas nin memorandum na naghuhurot sa mga alcalde, MDRRMC asin BDRRMC chairpersons, barangay kapitan, asin mga pamayo kan escuelahan na magparticipar sa province wide clean up asin ini mantenido kan bagong gobernador Luigi Villafuerte an kampanya laban sa caso dengue. (DPAureus)