Komunidad nin Muslim dai makikiaram sa divorce bill

Ibasura man o aprubaran sa congreso an liwat na binuhay na divorce bill an Maranao Guild for Solidarity (MGS) Inc, sarong grupo nin komunidad nin Muslim sa Ciudad nin Naga nagpahayag na yaon na an bola sa mga lehislador kun saindang papaboran an bill.

Si Mike Mustapa, pamayo kan MGS asin presidente kan Muslim Federation for Development Incorporation sa Camarines Sur, sinabi kaini na saro sa pig-uurulayan sa saindang komunidad an isyu sa divorce bill alagad saindang piglinaw na dai man sinda apektado dawa aprubaran o ibasura.

An mga lalaking Muslim tinutogon sa sainda na puedeng mag-agom sagcod sa lima kun kayang buhayon an dakul na familia alagad sa parte kan babae dai tinutogotan, sabi pa ni Mustapa.

Sa ngunian maabot na sa cuatro mil an populasyon kan Muslim sa Naga asin Camarines Sur.

An representante kan 1st District Edcel Lagman kan Albay liwat pig-filed an bill nganing legalisaron na an diborsyo sa nasyon.

An House Bill 78, ‘‘an Act Reinstituting Divorce as an Alternative Mode for the Dissolution of Marriage’’.

Sinabi na an divorce bill enot nang na-aprubaran sa Committee on Population and Family Relations kan Agosto 2021 alagad naabala sa Committee on Appropriations nin huli kan pandemya.

Kun saro nang ley an diborsyo an mga esposa puedeng maging ‘‘liberated’’ sagcod na makahawas sa mga pang-aabuso asin makahanap liwat nin iba.

An Filipinas iyo na sana an unikong nasyon, afuera kan Vatican, na dai tinutogot an ‘‘absolute divorce’’.

Alagad sa lado kan Katoliko Romano, piglalaoman na dai mapaboran an haloy nang plano na dapat igwa na nin ley sa diborsyo an satong nasyon.

Kan panahon ni dating Presidente Benigno Aquino III, an representante kan Albay iyo an authored kan Reproductive Health Act. (DPA)