top of page

Konstruksyon kan Angat Buhay dorm poponan tolos

Masikad tolos an konstruksyon kan Angat Buhay Dormitory sa laog kan compound kan Camarines Sur National High School (CSNHS) sa Peñafrancia Avenue, Ciudad nin Naga oras na makumpleto an mga kaipuhan sa building permit sa itutugdok na edificio.


Ini an mga pahayag ni dating Consejal Babeth Lavadia, Coordinator for Local Engagement kan Angat Buhay matapos kan ginibong ground breaking ceremony kan Hunyo 11, 2024 na pinangenotan ni dating Bise Presidente Atty. Leni G. Robredo na inatendiran ninda Principal Sulpicio Alferez III asin mga ka-partners kan foundation asin iba pang mga bisita.


Saiyang sinabi na 25 estudiantes an capacidad kan dormitory na prayoridad si hale pa sa ibang mga banwaan kan Camarines Sur.


Primero sa ciudad an proyecto alagad igua nang naenot sa Calabanga, Sorsogon asin iba pang lugar sa Bicol magin sa ibang rehiyon.


Si Principal Alferez nagpahayag na an proyecto ka-partner ninda an Naga City School Division Office kan DepEd na iyo an naghanap kan lugar na bubugtakan kan Angat Buhay dorm na napili an CSNHS.


An escuelahan iguang 10,500 na populasyon mantang 30 hasta 40 por ciento kan mga estudiantes hale sa luwas kan ciudad.


Alagad pigseguro kan principal na magiging extricto an saindang screening committee nganing mapili si mga estudiantes na decidido sa pag-adal asin dapat hale sa tios na mga familia.

Comments


bottom of page