Konstruksyon kan bagong City Hospital puponan na

Masikad na an konstruksyon kan bagong tolong eskalon na Naga City Hospital sa limang hektarya lote sa Barangay Balatas na mahiwas an bed capacity nganing matawan espasyo an nagdadakul na mga residente kan viente siete barangay kan ciudad.

An hospital magkakaigwa nin 160 bed capacity kumpara sa presenting lomang City Hospital sa Peñafrancia Avenue na igwa sanang 25 bed capacity na limitado pa an parking space asin hayapit an lugar.


Si Consejal Sonny Rañola, Chairman kan Committee on Health sa Sangguniang Panlungsod nagsabi na posibleng magsikad na an konstruksyon sa Deciembre 2021 alagad kun maabala ciertong sa enot na cuarto kan 2022.


An bagong hospital para sa level 1 alagad isasagad na an designed para level 2 nganing preparado an ciudad kun marealisar an plano mantang nakaandam sana an ICU asin iba pang facilidades.


Si Rañola iyo an padreno kan ordinansa nganing magpatugdok nin bagong City Hospital asin marerealisar sa presenting administrasyon ni Alcalde Nelson Legacion.


An jefe ejecutivo nagsabi na maninigo na an bagong edificio kan hospital sa ciudad na may mahiwas na bed capacity nganing maokupar sa nagdadakul na pasyente sa ciudad siring kan nangyari ngunian na pandemya.


An consejal iyo an pigdesignar ni Legacion komo Chairperson kan Design and Build Committee (DBC), vice chairperson – City Engr. Alexander Caning asin an mga miembro sinda, Arch. Jenifer Toralba, Engr. Emmel Adaque, Dr. Joseph Sanchez asin City Health Officer Dr. Vito Borja.


An dakulang proyekto kan ciudad igwang cantidad na P350 milyon na an fondo hale sa P700 milyon na inutang kan lokal na gobierno sa bangko base sa ordinansa kan Sangguniang Panlungsod. Alagad kabale na digdi an mga laboratoryo asin kumpletong ekipahes kan hospital.

Desinyo kan bagong ipapatindog na Naga City hospital sa Brgy. Balatas. (CEPPIO)