top of page

Konsultasyon sa pagbuelta kan klase se Hunyo nagpapadagos

An Department of Education (DepEd) Bicol nagpapadagos pa an mga ginigibong konsultasyon kan mga organisasyon nin paratukdo, lideres estudiantes, asin Parents Teacher Association sa propuestong ibuelta sa bulan nin Hunyo asin Marso an school calendar.


Si Director Gilbert Sadsad nagpahayag sa Bicol Mail na saiya nang hinahalat an mga resulta sa konsultasyon hali sa mga school division kan rehiyon.


Alagad sa inisyal na inpormasyon napag-araman kan Bicol Mail na mayoria kan mga paratukdo, PTA, magin estudiantes nagpapabor na ibuelta sa dating bulan nin Hunyo an burokasan nin klase sa sunod na school year 2024-2025.


Kun mangyari magigin paborable sa estudiantes asin paratukdo nganing makabakasyon asin ma-enjoy an ‘‘summer vacation.’’


Magigirumduman an school year niribayan huli sa epekto kan pandemya mantang apektado pa si mga estudiante sa pag-adal saka si paratukdo haros nagduble si saindang oras sa trabajo.


Si Bise Presidente asin Education Secretary Sara Duterte nagsugo sa mga pamayo kan public asin private school na magkunducir kan saindang konsultasyon nganing makadesisyon na an ahencia nasyonal.


Nagkapera nang lehislador an nagsusuporta na ibuelta an burokasan nin klase sa Hunyo asin Marso an school calendar.


Camarines Sur National High School. Saro sa may pinakadakulang populasyon nin estudiantes sa Bicol na labi nang doce mil ngunian na school year 2023-2024. (dpa)


SA EARLY REGISTRATION


Nagsikad na kan Enero 27, 2024 an early registration komo pag-andam kan mga escuelas publica asin pribado sa maabot na school year 2024-2025.


Ini an ginibong campanya kan DepEd sa pinaluwas na regional memorandum base sa opisina sentral guidelines sa programa, sa amay na pagpalista sa mga estudiantes an malaog sa kindergarten, grades, 1, 7 asin 11 asin ini matapos sa Febrero 23, 2024.


Sinabi ni Sadsad an programang ini nganing amay mapag-andaman kan saindang ahencia an numero kan maralaog sa klase asin pera an posibleng kinakaipuhan na dugang na paratukdo asin sa burokasan nin klase.


Mapaluwas man nin inporasyon kan mga nagpapalista aroaldaw sundo sa pagtapos kaini sa Febrero 23, 2024. (dpa)

댓글


bottom of page