Konsultasyon sa pagpatindogcell sites, iginilid na kan PU

Iginilid na kan Public Utility Committee kan Sangguniang Panlungsod kan Ciudad nin Naga an mga konsultasyon sa barangay kan hinahagad na permiso kan Dito Telecommunity nganing magpaconstruhir nin doceng cell sites sa ciudad.


Si Consejal Joselito Del Rosario pamayo kan PU committee nagpahayag sainda nang iginilid an mga nakatalaan na konsultasyon sa mga residente kan barangay matapos marecibe kan City Hall an Memorandum Circular hali sa Malacañan na dai na kaipuhan an paghagad nin public hearing asin approval kan LGU antes magpaconstruhir nin cell site an telcos.


An isyu sa ‘‘social acceptability’’ sa pagpatindog kan cell site mantang an ibang residentes kan bgry. nagcocontra sa peligro sa salud huli sa pigtutubodan na ‘‘radiation’’ iyo an katuyohan kan na enot na mga konsultasyon.


Alagad antes marecibe ninda an memorandum circular igwa na sindang na-enot na mga konsultasyon sa mga barangay kan San Isidro, Pacol, San Felipe, Concepcion Pequeña, Carolina asin Balatas asin ini para sa walong cell sites.


An Dito, iyo an ‘‘third major telecommunication company nagpupuon na kan sindang konstruksyon kan proyecto maging sa iba pang mga banwaan kan Camarines Sur.


Nag-aatubang sa controvercia an companya kasunod kan kahurotan ni Senador Risa Honteriveros dapat ma-imbestigaran an pagtugot asin paglaog kan Dito sa Filipinas sa isyu sa implikasyon sa national security.


An China envuelto sa operasyon kan companya, segun pa sa senador.


An companya dating Mindanao Islamic Telephone Company, Inc..


Sa ngunian an Dito Telecommunity Corporation afuera kan kabale sa korporasyon an negosyanteng Dennis Uy kan Davao kaayon pa sa grupo iyo an Chinese state-owned China Telecommunication Corporation, na saro man na companya kan China Telecom.


Ipinahayag pa an Dito nakatalaan magsikad an saindang operasyon sa nasyon sa Marso 2021. (dpa)