Krismas Sa Elementarya

Dai pa nalilingaw an mga Lolo asin mga Lola kan mga maogmang experiencia sa Christmas kan sinda yaon pa sana sa Elementarya. Ninhuli ta pobrehon pa kaidto an Pilipinas asin an mga palibot iyo an mga badang asin kaomahan, an mga harong gibo sa tiklad asin kawayan, madiklom an tinampo ta marumarom an bombilya kan Bicol Electric. Alagad an mga pobreng harong anas iguang nakabitay na farol na hugis Estrella, kaya maogmahon man giraray an Krismas maski pobre an kapalibotan. Kan ako yaon pa ako sa elementarya natatandaan ko an tugon kan samuyang maestra na iyo sinda Miss Elena Tancalao sa Grade 1, Mrs. Milagros Peralta sa Grade asin Mrs. Gloria Villegas sa Grade 3. Haros pareho an sistema kan samuyang Christmas Party ta an tugon kan mestra iyo na magdara nin soft drink asin kakanon asin magpatos nin regalo para sa manito asin manita. Kaidto pig ngangalasan pa an mga mansanas na may tatak California, kaya an pang regalo ko sa Manito iyo an tolong mansanas. Kan ako Grade One, an pig padara kan sakuyang ama iyo an sarong Tru Orange asin Star na Mamon, na an timplada hawig sa Chiffon cake alagad tunay na masiram ta ini maragsik an ibabaw alagad malomhok an iraraom. An Famoso sa Naga na para gibo nin star na mamon iyo si Tyong Felix Benito tubong Santa Cruz, siya an ninuno kan mga familyang Benito na an iba nagbalyo na sa San Felipe. Kaming mga escuela na tatao mag drawing, iyo an pig susugo kan maestra na magtarabang sa pag drawing sa black board nin santa Klaus asin belen na an pig usar iyo an mga de kolor na fchalks. Uso na kaidto an Christmas Cards na pig tatao sa kaklase ta magayon sa pagmate an makaresibe nin Christmas Cards na kaidto nababakal sa Boning’s Trading. Kadakol an nagsasabi na yaon sa Elementarya an pinaka maogmang Christmas ta an gabos barato asin nagiging maboot an mga tawo. Arog kan sinasabi sa mga kantang Pasko, dapat magbigayan kaya kadakol kaidto an maayahay an pagmati ta nakakaresibe nin mga regalo. Kan kami mga aki, si naging Santa Cruz Punong Barangay Enzo Narvaez iyo an sakuyang kaiba-iba sa karoling, kami sanang duwa asin ako an gitarista. An mga aki nag oorolay tanganing magformar nin grupo sa pagkarol. Saro sa diskusyon kan mga parakarol iyo an kung siisay sainda an magiging kahero o taga resibe kan bayad sa karoling. Aram daw nindo na ang korapsyon sa gobyerno danay na nagpoon sa pagka aki asin lalo na sa karoling. Ang kahero nag kukupit ta kunwari an sasabihon na bayad sa karoling cinco sana alagad diez palan an pig tao, igua siyang kupit na cinco. An gabos na iyan yaon na sana sa istorya ta an Christmas ngonian harayo nang marhay sa Christmas kaidto. Maogmahon an kristmas sa elementarya.