Kubo Sa Mananao, Maayahay

Ngonian na huna mo purgatoryo an grabeng alingasang kan panahon dara kan grabeng init kan Summer, saka mo ma aapreciar ang sarong harong sa bukid na yaon an inaapod na ayahay nin buhay asin ini an Borja’s Farm na makukua sa highway kan Barangay Mananao sa may boundary kan Sitio Buyo sakop kan Bgy.Bolaobalite sa banwaan nin Tinambac. Ang Borja’s farm pag rugaring ni Joel Borja, matuang tugang ni Tinambac Vice Mayor Ervin Borja. Kan nakaaging kafiestahan kan Tinambac kan May 17, inimbitaran an samuyang grupo kaiba sinda Randy Sto. Domingo, Gabby Casimiro, ang mag agom na Jimmy asin Butch Obiedo tanganing magpangodto sa ancestral home kan mga Borja sa Bgy Filarca Tinambac. Alagad antes kaming nagpasiring sa centro kan tinambac, nag stop over kami sa Borja’s Farm sa may Mananao, mga 5 minutos pang biyahe kan awto antes mag abot sa centro kan Tinambac. Tanganing mahale ang kapagalan sa biyahe ta grabe ang init kan panahon, naglaog kami sa sarong dakulang kubo na palibot nin net na dai puedeng makalaog ang ano man na layog layog, ang kubo konkreto ang fundasyon, may parting gibo sa kahoy asin kawayan asin pirmeng malinig ang salog asin makintab na mayong alikabok, iguang sala na gibo sa tukawan na kawayan na bagay sa orolay olay ta tuninong ang kapalibotan. Ang malipot asin mafreskong doros samuyang namamatean ta ang farm ni Joel palibot nin mga fruit trees arog kan avocado, pili, siregwelas, mangga,asin mahiwas na pinyahan asin kababatagan asin niyogan. Sa inotan iguang mga ataman na lahi nin baboy damo, iguang mga natural na manok, may kanding, may pabo asin nadadangog ang huni nin mga gamgam. Ang dai niamo malingawan iyo an pinag preparer na mga pagkakan sa mahiwas na lamesa. Ang mga pagkakan iyo ang mainiton pang tinomtoman na interong maharang ninhuli sa langkawas, igua pang mainiton na goto na ang halo iyo ang malomoy na karne nin natural na manok tunay na managom, igua pang malomoy na adobomg karne nin vaca, iguang bihon na may halong pasayan asin laman nin manok , iguang pancit, nakanamit pa kami nin toron na ang laog iyo ang masiramon na casava cake, may mainit pang batbecue, iguang pig steam nin lapu lapu, asin ang ultimo , iguang mahamot na dinuguan na laman nin orig asin maskara. An samuyang inomon apuera kan malinig na tubig iyo ang tipong na mahamis asin malomoy ang laman. Sa palibot mafresko asin malinig ang lawn, kaya iyo idto ang tunay na ayahay nin buhay na puedeng maabot sa paagi ni Joel Borja na masiram ang mga luto, malinigon ang doros, maayahay asin tunay na nakaka hale nin stress, ini yaon sa Mananao Tinambac.