Kultura nin Konsultasyon

Ang kada organisasyon igua nin kanya-kanyang kultura. Ang kultura segun sa mga literature o mga babasahon iyo ang sumada o kabuuan kan tiniripon na ugali, tradisyon, pagtubod, gawe, kaisipan o pananaw kan sarong lipunan o organisasyon. Sa satong pag-orolay, hilingon ta ang konsultasyon bilang sarong kultura-organisasyonal kan Naga City Independent Component City Agriculture and Fishery Council (ICCAFC), ang konseho kan satong mga paraoma asin parasira. Ang ICCAFC ang nagseserbing boses ninda na pinag-hahalean asin binabasehan kan mga polisiya na masuporta sa pagpakusog kan sektor kan agrikultura.

Nagkondusir nin Lakbay Panayam ang Regional Agriculture and Fishery Council (RAFC) kan digdi sa Ciudad nin Naga kan nakaaging semana. Sa akitbidad na may temang “Building a Culture of Consultation” nagkaigwa nin dialogue asin pagheras kan Revised DA-DILG Joint Memorandum Circular No. 1 Series of 2025 o ang pagpakusog kan suporta kan mga lokal na gobierno sa mga Agricultural and Fisheries Councils (AFCs). Ang nasabing memorandum naiheras kan bagong City Local Government Operations Officer (LGOO VI) kan Naga na si Mr. Elmer M. Villanueva Jr. Sa saiyang presentation, tinawan niyang duon ang importansya asin papel kan kada ahensya asin institusyon sa pag-realizar sa obheto kan joint memorandum circular.

Ang RAFC pinapangenotan kan presenteng mahigos na Chairperson, Ms. Claudia Honrado. Sa saiyang mensahe sa nasabing aktibidad, nagpahayag siya nin pag-apresyar sa ICCAFC Naga sa higos kan Chairperson na si Mr. Alfredo Gatongay. Bako sa pagbuhat nin sadiring bangko, pero masasabi na igua nin aktibo asin marhay na iribanan ngonian ICCAFC asin ang lokal na gobierno. Sa sakuyang personal na pagtubod, ang mga programa asin proyekto kan lokal na gobyerno sa paagi kan City Agriculture Office (CAgO) hale sa mga paraoma asin parasira asin kasimbagan sa mga pinag-aagihan na mga isyu o angat na inaatubang kan sektor.

Ang kultura nin konsultasyon naoobserbaran sa bukas na pag-komunikar sa laog asin sa luwas kan organisasyon, na ang kada kinokontribuwer na “input” kan kada saro tinatawan pagpapahalaga. Sa kulturang ini yaon ang pagkasararo sa pagkakaiba (unity in diversity), na maski iba-iba ang pinaghahalean o pananaw sa buhay igua man giraray nin malinaw na resolusyon dahil orog ang respeto sa orolay asin diskurso. Ang kultura nin konsultasyon nagdadalagan sa pagtubod na padagos pirmi ang pagpakarhay kan kapasidad o kakayahan kan organisasyon (continuous improvement).

Ang aspetong “continuous improvement” nadangog ko sa pagiromdom saro sa mga bisita mi kan Lakbay Panayam, ang RAFC Regional Coordinator, si Atty. Gladys Guzman, sabi niya, “maski dakul na pong nahaman ang organisasyon, do not rest in your laurels man po giraray”. Parte kan pagtalubo kan ICCAFC o ano man na organisasyon ang padagos na pag-midbid asin pagtao nin manunungod na aksyon sa mga bagay na kaipuhan ayuson.

Ang kultura nin konsultasyon sa mga institusyon ang saro sa mga nagpapadali kan mga proseso na mas nagpaparani sa pag-abot kan katongdan asin mga obheto kaini. Ang kulturang ini yaon sa kakayahan magdangog asin magpahalaga sa kada kontribusyon kan miembro. Kultura na bakong imposible, kultura na dapat pang mas paorogon.