Kumbersiyon kan DAR sa umahan dae bastante tanganing bugtakan kamposanto

Ni Paulo DS. Papa

DAE pa bastante an land conversion sa nasa 80,000 metros kwadrados na umahan sa Barangay Pacol, syudad nin Naga tanganing bugtakan basang nin pribadong kamposanto.

Iyan an pigheras ni Abogado Angel Ojastro III, an city legal officer kan Naga manungod sa lote na mawot bugtakan nin lubungan kan Eternal Gardens.

Matatandaan, durante kan pamamayo ni dating alkalde ngonian Deputado Nelson Legacion, kan tercer distrito kan Camarines Sur, pigpaontok an Eternal Gardens sa pagtugdok nin kamposanto sa lugar sa paagi kan cease and desist order na pigpadara kadto kan nasambit na opisina.

Segun ki Ojastro, ni development permit asin land reclassification mayong maipaheling an Eternal Gardens sa City Planning and Development Office (CPDO) - bagay na pigoobligar kan lokal na gobyerno komo rekisito.

Susug pa sa abogado, dawa igwa nin conversion an Department of Agrarian Reform sa lote, hale sa pan-agrikultura, dae ini bastante huli sa mga rekisitos na pigo-obligar ngani kan CPDO sa Eternal Gardens.

Sa presente igwa nin fencing activity o pagkudal sa area huli na man sa pigtaong fencing permit kan City Engineer's Office.

Si Acting City Engineer Elmer Albo, nagpaliwanag na pigtutugot an aktibidad dahil sa permiso.

Mayo nang ibang operasyon na pwedeng gibuhon an Eternal Gardens kundi an magkudal sabi pa ni Albo.

Sa ibong kaini kun manutaran an mga reklamo kan pagtaraid laban sa aktibidad, posibleng paontokon an pagkudal sa paagi kan pagpataw man nin cease and desist order sa Eternal Gardens hale sa saiyang opisina.