Kumbersiyon sa 'irrigated farm'' cuestionable sa CAGO

Naging cuestionable sa City Agriculture Office (CAGO) kan Ciudad nin Naga sa pamamayo ni Acting City Agriculture Ernesto Asence III kun panong nakakua nin kumbersiyon sa DAR an kagsadiri kan 86 mil metros cuadradong omahan sa Barangay Pacol apesar ‘‘irrigated farm’’ nganing gibohon kamposanto hale sa pan-agricultura.

Sinabi ni Asense na base sa probisyon kan Bureau of Soil Water Management prohibido an kumbersiyon kan omahan na iguang patubig o irrigated farm.

Saiyang sinabi na dapat mag-agi sa Cago antes kan kumbersiyon sa DAR nganing mag-isyu sinda nin Certificate na dai na ginagamit sa agricultura an omahan.

Barang-barang sa publico na inaagihan aroaldaw na kaomahan an sinambit na lugar na nagpondo sana sa pagpa-oma nin mga duwang taon alagad inaaprubaran sa central office kan DAR an kumbersiyon.

Sinabi man ni City Legal Office Atty. Angel Ojastro II na bakong bastante an land conversion sa sinambit na omahan sa Brgy Pacol nganing bugtakan sana nin pribadong kamposanto.

Dinagdag pa kan legal council sagcod sa ngonian pagka-aram niya mayong development permit asin land reclassification an Eternal Garden sa City Planning and Development Office kan ciudad na saro ni sa rekisitos kan lokal na gobierno.

Segun pa sa city legal officer dawa nakakua nin kumbersiyon hale sa pan-agricultura dapat magsunod sinda sa sinambit na pigmamando kan City Hall.

Sa ngunian an patrabajo sa lugar iyo an an pagpakudal na nakakua nin fencing permit, sabi ni City Engr. Elmer Albo.

Napag-araman na igua nang mga residentes sa Barangay Pacol an nagpipirima sa signature campaign kontra sa proyekto.

Kan nakaaging administrasyon ni Alcalde asin ngunian Representante kan tercer distrito kan Camarines Sur nag-isyu na nin cease and desist order sa manijamiento sa nag pagpapa-gibong kamposanto huli sa kawaran nin land reclassification.

Kinukudalan saka pigtambakan na nin daga an atubangan na parte kan mahiwas na omahan nganing gibohon na kamposanto sa Kilometro 5, Brgy Pacol, Ciudad nin Naga. Mga residentes sa lugar nahahandal sa tubig baha.