KUN DAI PA NAGTUKAW SA PWESTO SI ROBREDO: Manga poste sa tahaw kan tinampo pigponan nang haralion

Kinakaipuhan pang halaton kan mga motorista na magtukaw si Alcalde Leni Robredo komo bagong jefe ejecutivo kan Ciudad nin Naga nganing ponan nang haralion na kan Camarines Sur II Electric Cooperative (Casureco II) saka DPWH an mga poste sa tahaw kan tinampo.

Igua nang naaksidenteng motorista kan makabudal sa poste kan mga nakaaging bulan alagad dai tolos nag-aksyon asin kun dai pa sinadol kan bagong jefe ejecutivo dai poponan kan Hulyo 2 an pagbalyo kan mga poste sa gilid kan tinampo.

Sinabi ni Rinner Bucay, opisyal na parataram kan Casureco dos labi sa sangatos na mga poste an apektado sa mga barangay kan Balatas, Cararayan asin Del Rosario maging sa iba pang lugar. An mga tinampo digdi kabale sa pinahiwas kan DPWH alagad apesar na tapos na an proyekto an mga poste na yaon sa tahaw kan tinampo pinabayaan asin ngunian sana sa bagong administrasyon naging marikas an aksyon kan duwang ahencia.

Piglinaw kan Casureco II na iguang mga lugar na dai tolos maibalyo an ibang poste sa gilid kan tinampo huli ta makakalaog sa pribadong propriedad.

An mga pinahiwas na tinampo pig-implementar kan DPWH kan panahon sa dating administrasyon Alcalde Nelson Legacion na ngunian representante na kan tercer distrito kan Camarines Sur.