Kwarta-kwarta sana



Dai na kita magpara-plastikan , akoon ta na an politika negosyo. Iyan pinatotohanan nin sarong dakula asin veteranong politiko sa Bikol. Sabi ngani kayan kun mayo kang perak dai ka na magtapsok sa politika ta mayo kang aabuton.


Dagdag pa kan puderosong politiko, garo man lang ini pelikula ta an lamag kan sarong eleksyon mag-delhensya maguin an mga kandidato, an partidong nasa likod ninda, an mga higanteng politiko na nagpapadalagan kan kampanya asin an mga botante mismo.


An gusto pirmi magtabo sa takilya asin everybody’s happy.


Garo negosyo ta siyempre makapital ka. Kun manggana jackpot ka sa masunod na turno. Kun madaog lugui.


“Happy day’s are here again!” Iyan an kurahaw kan mga politiko, mga taga-gobyerno, lider politiko, o parabakal o para-pabakal nin boto pati taga-media ta gabos sinda aabuton nin lahar.


An magayon pati kan politika ngonyan ta pag-ulay pa lang nin kandidato igwa nang down payment, kun manggana an kandidato may permanenting sweldo sa laog nin pirang taon, may allowances pa asin ibang benefiscios arog kan pagbiyahe sa ibang parte kan nasyon asin kinaban.


Kun dai manggana siquera may sweldo durante kan karampanyahan. Kun madaog konsultant pa na may bayad.


Sa pagkaaram ko ngani sa kada barangay nin sarong municipyo asin banwaan nin sarong provincia na may mga konsultants na mantinido kan mga LGU’s bilang political leaders.


Dagdag pa kan gurangan na politiko an bilada sa politika garo showbiz o bilada ta iyo an kaogmahan kan masa.


May pana-o garo kun may pa-novena, an titulo kan pelikula pwedeng magbago pero an mga artista paro-pareho.


Puputikan ka, lilintianan ka, titikason ka, kakakanan ka pa. Kadto yan. Ngonyan dahil sa Covid mayo nang karakanan pero an purutikan, rilintianan asin tirikasan yaon pa pero with social distancing asin naka-maskara pa an kandidato asin ordinaryong tao.


Kwarta-kwarta lang an ralabanan. Kun sain hali an kwarta dai ta aram. Pwedeng hali man sana sa gobyerno ta.


Sa Camarines Sur an ralabanan kan mga encumbents an armas pirmi nang perak asin kwarta lalo na ngonyan na may pandemya.


Kun madagos an gran-encuntrada an hapot kan mga taga-provincia siisay an mas ma-kwarta si Villafuerte o si Andaya?