Labing sampolong sakay ki Ina ginigibo sa Partido Area
Ni Sonny Malate
Presentacion, Camarines Sur --- Labing sampolong sakay ki Ina asin Divino Rostro an ginigibo sa Partido Area kada bulan nin Septiembre sa pagrokyaw kan kafiestahan niya bilang Patrona kan Kabikolan. Tema kan Peñafrancia Celebration 2026: "Ina; Nurturing a Growing Church."
Apwera sa Tigaon, an siyam na mga banwaan asin nagkakapirang barangay sa distrito kan Partido nagkakaiguang Maritime (dagat) asin Fluvial (salog) procession na pigdadagsa kan rinibong devotos asin mga turista kada taon.
Sarong pambihirang sakay digdi an sa Parroquia ni St. Francis Xavier na nakabase sa barangay Halawigogon, Goa. Nasa ikapitong taon na, ini ginigibo sa irrigation canal kan National Irrigation Administration (NIA) sa nagkakapirang barangay sa Parroquia.
An mga sakay na ini ginigibo saro o duwang semanang enot sa dakulang fluvial procession sa ciuadad nin Naga, centro kan debosyon ki Maria sa bilog na Bicol. Ini tanganing magkaiguang oportunidad an mga devotos digdi na magsungko sa celebrasyon sa Naga.
Sa Parroquia ni San Vicente Ferrer sa barangay Maangas, ginibo kan nakaaging semana an ika-74 Maritime Procession ki Ina. Sakop an walong barangay kan Parroquia. An Maangas an pinakadakulang barangay sa banwa. Sakop kaini iyo an midbid na isla kan Aguirangan.
An mga devotos na gikan sa mga barangay kasabay an mga dayo maogmang nakisumaro sa celebrasyon. An ibang residentes na yaon na ngonian sa ibang lugar nag-uruli mantang an pag-iba sa sakay ni Ina parte na kan saindang buhay espiritual.
Si Rene Jardin, residente kan Maangas, 68 años, nag-istorya na dawa nagluluya na an saiyang paghiling asin puwersa resulta kan helang na diabitis, kada taon nagbabale siya sa procession sa mga mayor na kalye digdi bilang parte kan maludok na debosyon ki Ina na biyayaan siyang buhay bagsik
Kapareho ni Jardin, an mga devotos gikan sa walong barangay may mga personal man na intention sa pagrani ki Ina. An kadaklan sa sainda iyo an magkaiguang marhay na dakop asin proteksyon sa peligro sa paglawod sa dagat, an mayor na hanapbuhay digdi.
Dugang pa digdi iyo an irayo sinda sa katibaadan kun iguang raot nin panahon mantang an lugar napagtahawan kan Lagonoy Gulf asin bukid kaya harani sa baha asin landslide an lugar.
Ngonian na taon an Maritime procession dakol an nag-iriba huli ta kalmada an dagat asin marhay an panahon. Mayor na celebrante sa Banal na Misa iyo si Rev. Padre Raymund Payapag na sarong aki mismo kan barangay Maangas.
Mientrastanto, pigbuyagyag kan Cura Parroco, Rev. Padre Andres Balawis na an simbahan kan San Vicente Ferrer luma asin peligroso na. Kaipo an mayor na paghirahay o totalmente nang pagtugdok nin bagong estructura depende sa mahahaman na desisyon kan inheniero, simbahan asin ibang autoridad.
Hinagad kan Cura Parroco sa mga Parroquiano an pagtarabangan saka pagkasararo sa pagparambong kan Simbahan bilang physical na estructura asin Comunidad na nasa centro si Maria bilang Ina asin an Aking si Hesucristo.
Viva la Virgen! Viva El Divino Rostro!
Comments